Ndryshimi i klimës po i shkakton Evropës një gropë ekonomike prej 43 miliardë eurosh

Ndryshimi i klimës po i kushton shtrenjtë Evropës tashmë.

Thatësirat, valët e të nxehtit dhe përmbytjet e kësaj vere i kanë kushtuar Bashkimit Evropian rreth 43 miliardë euro këtë vit, duke ulur gati gjysmë pike përqindjeje prodhimin ekonomik të rajonit, sipas një studimi të publikuar të hënën. 

I njëjti studim vlerësoi se efektet e valëzuara nga ngjarjet e kësaj vere, do të shkaktojnë një dëm kumulativ në ekonominë evropiane prej rreth 126 miliardë eurosh deri në vitin 2029.

 “Këto vlerësime janë ndoshta konservatore”, thanë autorët e studimit, Sehrish Usman i Universitetit të Mannheimit, dhe Miles Parker dhe Mathilde Vallat, ekonomistë në Bankën Qendrore Evropiane.

Ngjarjet ekstreme të motit po bëhen më të shpeshta ndërsa gazrat serrë ngrohin botën.

Në vitin 2024, fatkeqësitë natyrore, përfshirë përmbytjet katastrofike në Spanjë, shkatërruan asete me vlerë 31 miliardë dollarë në Evropë, sipas kompanisë së sigurimeve MunichRe.

“Ndryshimi i klimës ka rritur frekuencën dhe intensitetin e ngjarjeve ekstreme të motit si përmbytjet, thatësirat, valët e nxehtësisë, zjarret në pyje dhe e gjithë kjo po kontribuon në rritjen e kostos ekonomike për rajonet evropiane”, tha Usman në një aktivitet në Bruksel të hënën.

Studimi përfshinte dëmet fizike në ndërtesa dhe infrastrukturë, si dhe ndikimin në produktivitetin dhe efikasitetin e punëtorëve, si dhe efektet anësore në pjesë të tjera të ekonomisë. Ai nuk përfshinte dëmet nga zjarret që dogjën më shumë se 1 milion hektarë në Evropë këtë vit.

«Këto ngjarje nuk janë vetëm tronditje të përkohshme», tha Usman. «Ato i manifestojnë ndikimet e tyre me kalimin e kohës». Përmbytjet mund të prishin zinxhirët e furnizimit. Thatësirat mund të dëmtojnë rendimentet bujqësore.

«Fillimisht, kjo është vetëm një valë e të nxehtit», tha ajo. «Por ndikon në efikasitetin tuaj, zvogëlon produktivitetin tuaj të punës».

Thatësirat ishin më dëmtueset, duke shkaktuar një humbje prej rreth 29.4 miliardë eurosh për BE-në këtë verë. Valët e të nxehtit dhe përmbytjet shkaktuan dëme prej 6.8 miliardë eurosh dhe 6.5 miliardë eurosh, përkatësisht.

Evropa Jugore, një rajon veçanërisht i ndjeshëm ndaj ndryshimeve klimatike, u godit më rëndë. Qiproja, Greqia, Malta dhe Bullgaria pësuan humbje prej më shumë se 1 përqind të prodhimit të tyre ekonomik.

“Danimarka, Suedia dhe Gjermania tregojnë dëme relativisht më të ulëta, por frekuenca dhe madhësia e këtyre ngjarjeve, veçanërisht përmbytjet, po rriten gjithashtu në këto rajone”, shkruan studiuesit.

Gjetjet vijnë menjëherë pasi shkencëtarët e klimës raportuan se ngrohja globale, bëri që vala e të nxehtit në korrik në Norvegji, Suedi dhe Finlandë të ishte 2 gradë Celcius më e nxehtë nga sa do të kishte qenë ndryshe. Shkencëtarët kanë llogaritur gjithashtu se zjarret në Spanjë dhe Portugali, u bënë 40 herë më të mundshme nga ndryshimet klimatike./ Politico.