Ndonjëherë fokusohemi aq shumë në punë, sa lëmë pas dore veten tonë e harrojmë të plotësojmë nevojat që kemi, siç është pushimi.

Që të jemi sa më produktivë në punë, duhet patjetër edhe të pushojmë e të marrim kohën për të qetësuar nervat e për t’u shplodhur. Këtë ka bërë edhe aktorja e famshme Jennifer Aniston.

Pas një pune intensive dhe aspak pushim që prej periudhës së pandemisë, ajo ka ditur të thotë “STOP”.

Qershorin dhe Korrikun, aktorja do t’i shijojë për veten e saj, duke udhëtuar e duke u relaksuar.

“Në biznesin tonë, ju duhet të kërkoni kohën e lirë ose ta caktoni atë, sepse gjithmonë ka diçka që do të shfaqet. Kështu që unë mendoj se pas javës tjetër do të pushoj qershorin dhe korrikun. Nuk e kam bërë kurrë këtë, por me të vërtetë mendoj se do ta bëj. Unë do të udhëtoj sepse nuk e kam bërë që nga pandemia. Jam bërë shumë e izoluar. Por është koha për ta kapërcyer këtë, është shumë e lehtë të biesh në agorafobi pas kësaj pandemie. Dhe unë refuzoj që kjo të ndodhë”.- tha aktorja.

Në fakt, na frymëzoi edhe neve të rezervojmë pushimet!