Duke folur në një mbrëmje humanitare kushtuar shëndetit të trurit femëror në Los Angeles, Sharon Stone ka rrëfyer se Hollyëoodi ka qenë i pamëshirshëm ndaj saj para 18 vitesh kur kishte përjetuar goditje të rëndë në tru.

Aktorja e famshme amerikane duke kujtuar përvojën personale, ka thënë se kjo gjendje është shumë e rrezikshme dhe për t’u shëruar nevojitet kohë e gjatë.

“Më janë dashur shtatë vite që të vi në vete. Nëntë ditë kam pasur gjakderdhje në tru”, citon Variety fjalët e 61-vjeçares.

 “Kam duruar çnjerëzi dhe shëmti nga koleget e mia e deri në gjykatën që vendosi për kujdestarinë ndaj djemve të mi”, ka treguar Stone, e cila asokohe u shkurorëzua nga gazetari Phil Bronstein.

Goditja në tru (insulti cerebral) është një urgjencë mjekësore. Goditja në tru ndodh kur ndalon qarkullimi i gjakut në tru. Brenda pak minutash, qelizat trunore nisin të vdesin. Janë dy lloje goditjesh në tru.

Më e shpeshta quhet iskemia trunore kur ndodh bllokimi i një ene të gjakut për shkak të mbylljes nga ndonjë tromb dhe kështu pamundësohet qarkullimi i gjakut në tru. Ndërsa lloji tjetër quhet goditja hemorragjike që shkaktohet kur një enë e gjakut dëmtohet dhe gjaku rrjedh brenda trurit.

‘Mini-goditjet në tru’ ose sulmet kalimtare iskemike (TIA) ndodhin kur furnizimi me gjak në tru është i ndërprerë përkohësisht.

Në atë kohë, Sharon ishte aktorja më e kërkuar për filma, mirëpo për shkak të sëmundjes e humbi atë status.

“Në atë kohë isha aktorja më e kërkuar. Përpiqesha të funksionoj normalisht, të punoj, ndërsa më pas ngrita hipotekë të re në shtëpinë ku jetoja. Humba gjithçka që kisha. Pastaj e humba edhe statusin që e kisha në Hollywood”, ka rrëfyer ajo.

Stone i ka këshilluar të tjerët që të jenë të vëmendshëm nëse përjetojnë një gjendje të ngjashme.

“Nëse ju dhemb shumë koka, duhet të shkoni në spital. Unë jam lajmëruar te mjekët në spital në ditën e tretë pas goditjes në tru”.

“Shumica e njerëzve vdesin në atë periudhë, kisha shanse vetëm një për qind për të mbijetuar nga operacioni. Rreth një muaj nuk e kanë ditur nëse do të mbijetoja. Nuk e kam pasur idenë se kam qenë në gjendje aq të rëndë, derisa kam lexuar në gazeta”, ka thënë aktorja.