SYRI TV/ Bllokimi i aeroportit të Vlorës, shteti do të ndërhyjë për të zgjidhur situatën

Pas bllokimit të aeroportit të Vlorës, për shkak të përplasjes mes dy aksionerëve, qeveria do të ndërhyjë për të zgjidhur situatën. Ministri i Energjisë dhe Infrastrukturës, Enea Karakaçi, deklaroi se pavarësisht mosmarrëveshjeve private, shteti do të ndërhyjë sepse aeroporti është infrastrukturë strategjike, ndërsa paralajmëroi masa deri në anulimin e kontratës koncesionare.

Syri TV 

Shteti do të ndërhyjë për të zgjidhur situatën, pas bllokimit të punimeve në Aeroportin e Vlorës, për shkak të përplasjeve mes dy kompanive ortake, që kanë marrë përsipër ndërtimin e këtij aeroporti.

Ministri i Energjisë dhe Infrastrukturës, Enea Karakaçi, deklaroi sot se shteti po përgatitet të ndërhyjë për të zgjidhur situatën, për shkak se aeroporti i Vlorës është infrastrukturë me rëndësi kombëtare, duke paralajmëruar madje edhe mundësinë e anulimit të kontratës.

Prej muajsh, dy aksionerët që kanë marrë kontratën për ndërtimin e aeroportit, Mabco Constructions S.A, e drejtuar nga Behgjet Pacolli, dhe 2A Group të Valon Ademi, janë përfshirë në një konflikt të ashpër sa i përket aksioneve dhe administrimit të aeroportit të Vlorës, ndërsa në ditët e fundit përplasjet u përshkallëzuan duke u zhvendosur edhe në kantierin e aeroportit, duke lënë pezull vënien në funksion të tij.