Ministri i Jashtëm francez, Jean-Noel Barrot, përshëndeti marrëveshjen kornizë midis Libanit dhe Izraelit në një telefonatë me Sekretarin e Shtetit të SHBA-së, Marco Rubio, duke riafirmuar gatishmërinë e Francës për të mbështetur zbatimin e saj, tha Ministria e Jashtme të mërkurën.

Sipas ministrisë, Barrot dhe Rubio e mirëpritën marrëveshjen dhe "rolin vendimtar", që luajtën SHBA-të në arritjen e saj.

Barrot riafirmoi gatishmërinë e Francës për të kontribuar në zbatimin e marrëveshjes "me qëllim që të lejohet rivendosja e plotë e sovranitetit libanez, ushtrimi nga shteti libanez i monopolit të armëve dhe tërheqja e ushtrisë izraelite nga territori libanez, duke garantuar njëkohësisht sigurinë si të Izraelit ashtu edhe të Libanit".

Më 26 qershor, Bejruti dhe Tel Avivi nënshkruan një marrëveshje të sponsorizuar nga SHBA-të, e cila synonte të lehtësonte një tërheqje graduale të Izraelit nga territori libanez dhe të zvogëlonte armiqësitë përgjatë kufirit. Ofensiva e fundit izraelite në Liban filloi në fillim të marsit, pas hakmarrjes së Hezbollahut ndaj luftës së Iranit.

Të dy ministrat shqyrtuan gjithashtu zbatimin e memorandumit të lidhur midis SHBA-së dhe Iranit më 14 qershor dhe të nënshkruar nga Presidenti i SHBA-së Donald Trump në Versajë më 17 qershor.

Barrot përsëriti nevojën për një "marrëveshje të fortë dhe të verifikueshme", që garanton se Irani nuk do të pajiset kurrë me armë bërthamore.

Në bisedë u trajtua edhe situata në Ukrainë pas diskutimeve në samitin e fundit të G7 në Evian, si dhe përgatitjet për samitin e NATO-s që do të mbahet në Ankara më 7-8 korrik./ AA.