Vrau ish të dashurën 4 dekada më parë, Gjykata dënon me burgim të përjetshëm 67-vjeçarin

Një gjykatë gjermane dënoi të hënën një burrë 67-vjeçar me burgim të përjetshëm, për vrasjen e ish-të dashurës së tij më shumë se katër dekada më parë.

I pandehuri rrëfeu vrasjen e infermieres 19-vjeçare në dhomën e saj më 30 korrik 1984.

"Më vjen thellësisht keq", tha ai në deklaratën e tij përfundimtare, duke e përshkruar vrasjen si të paplanifikuar. Gjykata e dënoi atë për vrasje me paramendim. 

Kryetari i trupit gjykues, Karsten Krebs, tha se viktima, Maria Köhler, ishte mbytur me shallin e saj prej rrjete për katër deri në pesë minuta, dhe "nuk kishte asnjë shans për të mbrojtur veten".

Prokurorët besojnë se vrasja u nxit nga zemërimi dhe xhelozia, pasi Köhler i dha fund lidhjes, dhe filloi të takohej me një ushtar amerikan të stacionuar në shtetin qendror gjerman të Hessen. Kryeprokurori publik Jürgen Bundschuh tha se i pandehuri veproi "me qëllim për të vrarë".

Mbrojtja kishte kërkuar lirim nga akuzat, duke argumentuar se çështja përbënte vrasje të paqëllimshme - një vepër penale që i nënshtrohet parashkrimit në Gjermani. Avokatja mbrojtëse Diane Waterstradt tha se klienti i saj kishte shkuar ta takonte gruan e re për të folur me të dhe për të marrë sendet e tij para se të shpërthente një grindje.

Pas krimit, i dyshuari pa shtetësi iku në Turqi dhe mbeti i pagjurmueshëm për dekada. Hetuesit thanë se ai u kthye në Gjermani në mesin e vitit 1998 me një emër tjetër, me një grua gjermane me të cilën ishte martuar në Turqi. Ai u kthye në Turqi 16 vjet më vonë.

67-vjeçari më parë humbi shtetësinë turke, sepse refuzoi të kryente shërbimin ushtarak në Turqi.

Në fund të vitit 2024, hetuesit e çështjeve të pazbuluara e rihapën çështjen dhe përfundimisht e gjetën të dyshuarin në Turqi. Ai u ekstradua në Gjermani shtatorin e kaluar dhe që atëherë ndodhet në paraburgim./ DPA News.