Një i vdekur dhe një i plagosur rëndë pas të shtënave me armë në zonën e tifozëve të Kupës së Botës në Kaliforni

Një person u vra dhe një tjetër u plagos rëndë të dielën në një të shtënë me armë në një vend argëtimi të njohur në San Jose të Kalifornisë, i cili kishte pritur një “zonë tifozësh” për transmetimin e ndeshjeve të Kupës së Botës, njoftoi policia.

Në kohën e të shtënave nuk po transmetoheshin ndeshje të Kupës së Botës, pasi e vetmja ndeshje e ditës në turne kishte përfunduar rreth orës 14:00, sipas orës lokale.

“Një person u shpall i vdekur në vendngjarje. I plagoduri u transportua në një spital lokal me lëndime kërcënuese për jetën”, tha policia e San Jose në një postim në platformën e mediave sociale X.

“Ky incident po hetohet si vrasje. Disa rrugë përreth janë të mbyllura në zonë”, thuhej më tej.

Incidenti ndodhi në Sheshin San Pedro, një nga disa vendet në Zonën e Gjirit të San Franciskos, ku turma të mëdha janë mbledhur për të parë ndeshjet e Kupës së Botës.

Zona e Gjirit të San Franciskos ka pritur pesë ndeshje të Kupës së Botës deri më tani, me ndeshjen e fundit, një takim eliminator të mërkurën midis Bosnjës dhe bashkëorganizatorëve, Shteteve të Bashkuara.

Vendi i ngjarjes u rrethua me kordon dhe shumica e bareve në zonë u mbyllën pas incidentit.

Ka disa dhjetëra zona tifozësh në të gjithë Zonën e Gjirit.