Të paktën tre persona u plagosën sot gjatë një konfrontimi të dhunshëm midis autoriteteve afgane dhe protestuesve që kundërshtuan burgosjen e më shumë se dhjetë grave për shkelje të kodit të veshjes. Sipas dëshmitarëve okularë, policia e armatosur hapi zjarr gjatë një proteste ku morën pjesë më shumë se 100 persona në qytetin e Heratit.

Protestat kanë qenë të rralla në Afganistan që kur talebanët morën pushtetin në vend në vitin 2021, pas tërheqjes kaotike të forcave të udhëhequra nga SHBA-të.

Që atëherë, janë futur rregulla të rrepta të bazuara në një interpretim të ngurtë të ligjit të Sheriatit. Ato përfshijnë kufizime drakoniane për gratë dhe vajzat, duke përfshirë ndalimin e arsimit përtej shkollës fillore dhe kode të rrepta veshjeje në publik. Mosmarrëveshja me vendimet e autoriteteve nuk tolerohet dhe protestat janë të ndaluara.

Sipas rregulloreve aktuale, grave u lejohet të dalin në publik plotësisht të mbuluara - duke mbajtur shami koke dhe rroba të gjata që mbulojnë të gjithë trupin, si dhe fytyrën, në mënyrë që të shihen vetëm sytë. Zbatimi i këtyre rregullave mbikëqyret nga Ministria për Promovimin e Virtytit dhe Parandalimin e Veseve, një institucion që mbjell frikë tek publiku.

Hetuesi special i Kombeve të Bashkuara për të drejtat e njeriut në Afganistan, Richard Bennett, tha se ishte "i shqetësuar nga përdorimi i tepërt i forcës kundër atyre që dukeshin si protestues paqësorë në Herat".

Në një postim në X, ai tha se ata që janë përgjegjës për dhunën duhet të mbahen përgjegjës.

“Është koha për të ulur tensionet, për të respektuar lirinë e shprehjes së qytetarëve, veçanërisht grave dhe vajzave, dhe për të shmangur dëme të mëtejshme”, tha Bennett.

Të dielën, Misioni i Ndihmës i Kombeve të Bashkuara në Afganistan (UNAMA) tha në IX se arrestimet dhe ndalimi i grave në Herat për shkelje të dyshuar të kodit të veshjes ngritën "shqetësime serioze për të drejtat e njeriut".

UNAMA kujtoi se vitin e kaluar shprehu shqetësim për arrestime të ngjashme në Kabul.

Një vëzhgues në kushte anonimiteti se monitoruesit kanë konfirmuar të paktën 16 arrestime dhe ndalime në Herat që nga e premtja, përfshirë arrestimin e një gruaje shtatzënë, për dyshime se nuk i është përmbajtur kodit të veshjes.

Ministria e Afganistanit për Promovimin e Virtytit dhe Parandalimin e Veseve ka hedhur poshtë raportet për arrestime dhe ndalime të grave në vend.

"Akuzat që po përhapen për arrestimin e grave në Herat janë tërësisht thashetheme", tha Ministria, duke shtuar se mbajtja e "hixhabit është një urdhër hyjnor dhe një ligj që ne jemi të detyruar ta zbatojmë".

Gjatë lutjeve të së premtes javën e kaluar, imamët në xhamitë në Herat lexuan njoftime në emër të Ministrisë për Promovimin e Virtytit dhe Parandalimin e Veseve, të cilat thoshin se gratë nuk lejohen të dalin nga shtëpitë e tyre pa veshur hixhabin. Organizata mbikëqyrëse e të drejtave të njeriut tha se arrestimet dhe ndalimet filluan menjëherë pas këtyre njoftimeve.