Përgjigje ndaj ‘operacionit të sigurisë’ së Kinës - Tajvani dërgon anije

Në përgjigje të një “operacioni sigurie” kinez në ujërat në lindje të Tajvanit, roja bregdetare e ishullit të qeverisur në mënyrë demokratike ka dërguar anije në zonën e prekur.

Masa u ndërmor për t'iu përgjigjur “në mënyrë të përshtatshme” veprimeve të Kinës, deklaroi roja bregdetare të dielën. Taipei pohon se operacioni i Kinës shkel “ligjin ndërkombëtar”. Anijet kineze u monitoruan “gjatë gjithë operacionit”.

Sipas mediave shtetërore kineze, Ministria e Transportit në Pekin ka thirrur rojet bregdetare nga provincat Fujian dhe Guangdong për të "kryer një operacion të posaçëm, për të zbatuar ligjet e trafikut detar në ujërat në lindje të Tajvanit". Siç raportoi agjencia e lajmeve Xinhua të shtunën, manovra e Pekinit është "një masë e nevojshme kundër njoftimit të njëanshëm nga Japonia dhe Filipinet, se do të fillojnë 'negociatat për të vendosur një kufi detar'" pranë Tajvanit.

Pakënaqësi në Pekin

Sfondi i kësaj janë bisedimet midis Tokios dhe Manilës, në lidhje me kufijtë e tyre detarë. Japonia dhe Filipinet njoftuan muajin e kaluar se do të fillonin bisedime zyrtare "për të përcaktuar kufirin detar" të një zone të përbashkët ekonomike - një veprim që shkaktoi pakënaqësi në Pekin.

Kina e konsideron Tajvanin demokratik dhe vetëqeverisës një provincë rebele që synon ta ribashkojë me kontinentin, nëse është e nevojshme me mjete ushtarake. Ajo i ka cilësuar bisedimet midis Tokios dhe Manilës si "të paligjshme", dhe pretendon kontroll ekskluziv mbi ujërat në fjalë.

Rezervat e përbashkëta të Manilës dhe Tokios në lidhje me pretendimet territoriale detare të Kinës, kanë çuar në një afrim më të ngushtë midis dy vendeve në vitet e fundit. Megjithatë, marrëdhëniet sino-japoneze janë përkeqësuar ndjeshëm që kur kryeministrja e re konservatore e Japonisë, Sanae Takaichi, mori detyrën. / Der Standard.