Spanjë/ Tentativa për vrasjen ndaj politikanit të ekstremit të djathtë, arrestohen 8 persona, dyshime se pas kësaj fshihet Teherani

Gjykata e Lartë e Spanjës ka ngritur aktakuzë ndaj tetë personave për tentativën për vrasje të politikanit të ekstremit të djathtë dhe ish-deputetit Aleho Vidal-Kuadras, i cili lidhet me lidhjet e tij me një organizatë opozitare iraniane dhe mbështetjen që ai i ka dhënë disidentëve iranianë.

Vidal-Kuadras, 80 vjeç, një nga themeluesit e partisë së djathtë ekstreme Vox, u qëllua në fytyrë nga pasagjeri i një motoçiklete teksa ecte në lagjen Salamanca të Madridit më 9 nëntor 2023. Plumbi i ka kaluar nëpër nofull.

Hetuesi Santiago Pedraz deklaroi se sulmi ishte urdhëruar nga persona të panjohur që donin të hakmerreshin për mbështetjen që ai kishte dhënë për ata që kundërshtojnë udhëheqjen fetare të Iranit. Sipas një dokumenti gjyqësor që ka rënë në duart e agjencisë Reuters, këta persona të panjohur u drejtuan te anëtarë të organizatave kriminale për të përmbushur ‘një mision’, që përfshinte vrasjen e Vidal-Kuadras.

Sipas Pedrazit, të dyshuarit janë pjesë e një grupi të përfshirë në vrasje, dhe disa prej tyre janë të kërkuar në disa vende.

Dyshime se Teherani fshihet pas përpjekjeve për vrasje në Europë

Shërbimi inteligjent holandez kishte deklaruar më herët këtë vit se dyshon se Teherani qëndron pas dy tentativave për vrasje në Europë. Autori i dyshuar i atentatit ndaj Vidal-Kuadras është arrestuar në Holandë dhe akuzohet gjithashtu në atë vend për tentativë vrasjeje të një iraniani. Tetë të dyshuarit janë akuzuar për krijim grupi kriminal dhe tentativë për vrasje me qëllime terroriste.

Sipas gjyqtarit spanjoll, ata i kanë ofruar autorëve mbështetje logjistike, si automjete, para dhe armë.

"Jam shumë i kënaqur me vendimin e gjyqtarit, sepse pasqyron realitetin e çështjes. Shpresoj që tani edhe qeveria të ndërmarrë ndonjë veprim", tha Vidal-Kuadras për agjencinë Reuters.

Prokuroria dhe avokatët mbrojtës kanë të drejtën të apelojnë akuzat përpara se çështja të kalojë në sallën e gjyqit.

Në tetor të vitit 2022, Irani e përfshiu Vidal-Kuadras në listën e personave të sanksionuar, si kundërpërgjigje ndaj sanksioneve evropiane pas vdekjes së Mahsa Amini, 22-vjeçares kurde që humbi jetën pasi u arrestua nga "policia e moralit" iraniane për shkak se nuk respektoi kodin e rreptë të veshjes në vend.