Starmer dhe Macron bashkojnë forcat kundër emigracionit të paligjshëm përmes Kanalit të La Manshit

Kryeministri britanik Keir Starmer dhe presidenti francez Emmanuel Macron kanë rënë dakord për të intensifikuar masat kundër emigracionit të paligjshëm, me fokus të veçantë në ndalimin e kalimeve me varka të vogla nëpër Kanalin e La Manshit. Marrëveshja u arrit gjatë një takimi zyrtar të mbajtur sot në Londër, ku të dy liderët u shprehën për nevojën e një qasjeje të përbashkët dhe më vendimtare ndaj këtij fenomeni.

Në deklaratën e lëshuar nga qeveria britanike thuhet se Starmer dhe Macron e konsideruan këtë çështje si një kërcënim të përbashkët që kërkon bashkëpunim konkret dhe të thelluar mes dy vendeve. “U ra dakord që duhet bërë progres për masa të reja dhe novatore,” thuhet në deklaratë, ku përmendet edhe krijimi i një mekanizmi të ri ndalues për të shkatërruar rrjetet kriminale që përfitojnë nga trafikimi i emigrantëve.

Takimi vjen në një moment kur numri i emigrantëve që përpiqen të kalojnë Kanalin e La Manshit në mënyrë të paligjshme është rritur ndjeshëm, veçanërisht gjatë muajve të verës. Dy liderët theksuan se trajtimi i këtij problemi kërkon bashkëpunim operacional, teknologjik dhe financiar për të ndaluar rrjedhën e trafikimit dhe për të ruajtur sigurinë kufitare.

Analistët e shohin këtë si një sinjal të qartë për një kthesë më të ashpër në politikat e emigracionit në të dyja anët e Kanalit.