Papa Leo feston Meshën e parë 'të gjelbër' pasi kritikon lakminë që nxit padrejtësinë klimatike

Papa Leo XIV ka ndërmarrë hapa konkretë drejt mbrojtjes së mjedisit, duke ndjekur dhe thelluar trashëgiminë ekologjike të Papa Françeskut. Të mërkurën, ai kremtoi Meshën e parë papnore “të gjelbër”, në kopshtet e qendrës së re arsimore ekologjike të Vatikanit në Castel Gandolfo, duke përfshirë lutje të posaçme për kujdesin ndaj krijimit të Zotit.

Mesha, e zhvilluar për Qendrën “Laudato Si” – e frymëzuar nga enciklika mjedisore e vitit 2015 – vjen si përgjigje ndaj thirrjes së kishës për të sensibilizuar mbi drejtësinë klimatike dhe ruajtjen e natyrës.

Paralelisht, Papa Leo ka zbuluar planin ambicioz për ndërtimin e një ferme diellore në territorin e Santa Maria di Galeria, që do të mundësonte prodhimin e mjaftueshëm të energjisë për të plotësuar të gjitha nevojat e Vatikanit. Kjo nismë, e cila kërkon investime deri në 100 milionë euro dhe miratimin e parlamentit italian, do të bënte që Vatikani të jetë shteti i parë në botë neutral ndaj karbonit.

Në një mesazh të fundit për Ditën e Lutjes për Krijimin, Papa Leo dënoi hapur padrejtësitë mjedisore, duke përmendur ndotjen, shpyllëzimin dhe humbjen e biodiversitetit si pasoja të drejtpërdrejta të lakmisë dhe shkeljes së të drejtave ndërkombëtare. Ai theksoi se ndryshimet klimatike të shkaktuara nga aktiviteti njerëzor godasin më rëndë të varfrit, të margjinalizuarit dhe popujt indigjenë – një përvojë që ai e ka jetuar personalisht si misionar në Peru.

Në vijim të pushimeve të tij në Castel Gandolfo, Papa Leo pritet të vazhdojë përpjekjet për të kthyer Vatikanin në një model të qëndrueshmërisë globale, duke u bërë një zë i fuqishëm moral në luftën kundër krizës klimatike.