Macron: Evropa dhe Britania duhet të hapin shtigje të reja bashkëpunimi përballë sfidave globale

Evropa dhe Mbretëria e Bashkuar duhet të hapin rrugë të reja bashkëpunimi përballë sfidave të mëdha globale, deklaroi presidenti francez Emmanuel Macron gjatë mbërritjes në Britani për një vizitë zyrtare tre-ditore.

“Ky është një moment i rëndësishëm për vendet tona, por gjithashtu edhe për Evropën tonë,” theksoi ai.

“Do t’i qasemi së bashku sfidave të mëdha si siguria, mbrojtja, energjia bërthamore, hapësira, inovacioni, inteligjenca artificiale, migracioni, kultura. Janë shumë fusha në të cilat synojmë të veprojmë në mënyrë të përbashkët, për të thelluar bashkëpunimin tonë në mënyrë konkrete, efektive dhe të qëndrueshme,” shkroi Macron në platformën X.

“Vullneti i shprehur nga Mbretëria e Bashkuar për t’iu afruar Bashkimit Evropian është një sinjal i fortë, të cilin e përshëndes. Ai na angazhon të gjithëve që të hapim rrugë të reja bashkëpunimi, duke respektuar interesat e ndërsjella,” shtoi ai.

Emmanuel Macron mbërriti në Britani i shoqëruar nga bashkëshortja e tij, Brigitte. Kjo është vizita e parë zyrtare e një udhëheqësi evropian në Mbretërinë e Bashkuar pas Brexit-it. Princi i kurorës William dhe bashkëshortja e tij Kate e pritën Macron dhe Zonjën e Parë franceze menjëherë pas zbritjes nga avioni.

Më pas, çifti presidencial u prit në kështjellën e Windsor-it nga mbreti Charles dhe mbretëresha Camilla. Syri.net-CNN.gr