Rënia e eksporteve gjermane thellon shqetësimet për një tjetër stanjacion ekonomik

Eksportet gjermane ranë më shumë se sa pritej në muajin maj, duke shtuar presionin mbi ekonominë më të madhe të Evropës në një kohë sfiduese për tregtinë dhe industrinë. Sipas të dhënave të publikuara nga Zyra Federale e Statistikave, dërgesat jashtë vendit ranë me 1.4% nga muaji në muaj, ndërsa importet ranë me 3.8%, duke sjellë një bilanc tregtar pozitiv prej 18.4 miliardë eurosh.

Rritja e eksporteve në muajt shkurt dhe mars u shty nga përpjekjet e prodhuesve për të shmangur tarifat e reja të paralajmëruara nga SHBA-të, por kjo u pasua nga një rënie e ndjeshme në prill dhe maj, duke treguar një valë të përkohshme. Veçanërisht të goditura ishin eksportet drejt SHBA-ve, të cilat mbeten destinacioni më i rëndësishëm për mallrat gjermane.

Administrata e Presidentit Donald Trump ka kërcënuar me tarifa të reja deri në 50% për disa mallra evropiane, përfshirë automjetet dhe çelikun, ndërsa afati për arritjen e një marrëveshjeje tregtare me BE-në skadon më 1 gusht. Ndërkohë, eksportet e automjeteve gjermane drejt SHBA ranë me 13% në prill dhe 25% në maj në krahasim me të njëjtët muaj të vitit të kaluar, sipas të dhënave nga shoqata e industrisë VDA.

Ekonomia gjermane është nën trysni të shumëfishtë: çmimet e larta të energjisë, mungesa e investimeve dhe produktiviteti i dobët kanë ndikuar negativisht në rritjen ekonomike. Megjithëse prodhimi industrial shënoi një rritje modeste prej 1.2% në maj, kjo nuk mjafton për të kompensuar rënien në sektorë të tjerë, si ndërtimi dhe shitjet me pakicë.

Përballë këtyre sfidave, qeveria gjermane ka miratuar masa të reja stimuluese, përfshirë rritjen e shpenzimeve për mbrojtjen dhe infrastrukturën. Kancelari Friedrich Merz synon të rrisë shpenzimet ushtarake në 3.5% të PBB-së deri në vitin 2029, ndërsa një fond jashtëbuxhetor prej 500 miliardë eurosh pritet të nxisë investimet në ekonomi.

Megjithatë, sipas ekspertëve ekonomikë, perspektiva afatshkurtër mbetet e zymtë. “Ekonomia gjermane duket e vendosur për një tjetër stanjacion ose edhe një tkurrje të vogël,” paralajmëroi të martën Carsten Brzesk nga ING.