Numri i të vdekurve nga përmbytjet në Teksas rritet në 91, paralajmërimet për stuhi vazhdojnë

Deri më tani 91 persona janë konfirmuar të vdekur, me të paktën 75 vetëm në Qarkun Kerr, pas përmbytjeve në Teksasin qendror.

Autoritetet thonë se përpjekjet e kërkimit vazhdojnë për të katërtën ditë me radhë, për dhjetëra persona që ende konsiderohen të zhdukur.

Kampi Mystic, një kamp veror për vajza në qark, konfirmoi se të paktën 27 vajza dhe anëtarë të stafit ishin midis viktimave.

Më shumë stuhi priten në rajon gjatë 24-48 orëve të ardhshme, të paktën deri të hënën në mbrëmje.

Presidenti i SHBA-së, Donald Trump, nënshkroi të dielën një deklaratë për fatkeqësi të madhe natyrore për Qarkun Kerr, ndërsa janë ngritur pyetje nëse janë dhënë paralajmërime të mjaftueshme për përmbytje.

Katastrofa ndodhi në orët e para të së premtes, ndërsa lumi Guadalupe u rrit me më shumë se 8 metra në më pak se një orë, duke shkaktuar dëme të mëdha.

Në Hill Country, ku ndodhën përmbytjet më të këqija, pritej të binte 5 deri në 10 inç më shumë shi, me zona të izoluara që do të marrin deri në 25 inç shi, tha Allison Santorelli, një meteorologe në Qendrën e Parashikimit të Motit të Shërbimit Kombëtar të Motit në College Park, Maryland.

Santorelli tha se përmbytjet e reja të mundshme mund të jenë veçanërisht të rrezikshme për shkak të tokës së ngopur me ujë dhe të gjitha mbeturinave që ndodhen tashmë brenda dhe përreth lumit.

Shërbimi meteorologjik lëshoi ​​një paralajmërim për përmbytje deri në orën 19:00 të hënën në rajon.

Zyrtarët e menaxhimit të emergjencave shtetërore kishin paralajmëruar të enjten, përpara festës së 4 korrikut, se pjesë të Teksasit qendror përballeshin me mundësinë e përmbytjeve të menjëhershme bazuar në parashikimet e Shërbimit Kombëtar të Motit./ BBC.