Polonia rivendos kontrollet kufitare me Gjermaninë dhe Lituaninë

Polonia ka rivendosur përkohësisht kontrollet kufitare me Gjermaninë dhe Lituaninë, në një përshkallëzim të masave ndaj emigracionit të paligjshëm që po tensionon marrëdhëniet me fqinjët.

Kryeministri Donald Tusk njoftoi se masat hynë në fuqi të hënën, duke theksuar se liria e lëvizjes duhet të shoqërohet me “veprim të bashkërenduar dhe simetrik” nga të gjitha palët.

Ministri i Brendshëm Tomasz Siemoniak sqaroi se kontrollet synojnë grupet e përfshira në kontrabandën e emigrantëve dhe jo qytetarët e zakonshëm. Masat do të zgjasin fillimisht 30 ditë dhe përfshijnë kontrolle ndaj autobusëve, minibusëve dhe automjeteve të dyshimta.

Lëvizja vjen pasi në Poloni janë shtuar akuzat nga e djathta ekstreme se Gjermania po transferon emigrantë drejt territorit polak, pretendim që kancelari Friedrich Merz e mohoi kategorikisht.

Ndërkohë, reagimet në Gjermani kanë qenë kritike, me përfaqësues të bizneseve dhe politikanë që paralajmërojnë se vendimi polak rrezikon të minojë sistemin Shengen dhe lirinë e lëvizjes në Evropë.