30 persona kanë gjetur vdekjen dhe qindra janë zhvendosur në përmbytjet shkatërrimtare në qytetin jugor të Hodeidah, pas disa ditësh shirash të dendur, njoftuan autoritetet, raporton AP.

Guvernatori i Hodeidah, Mugammad Qahim tha për TV Masirah të kontrolluar nga rebelët Houthi, se përmbytjet shpërngulën njerëzit nga 500 shtëpi, ndërsa pesë persona rezultojnë të zhdukur, tha ai.

Hodeidah, qyteti jugperëndimor i Taizit dhe qyteti veriperëndimor i Haxhit u goditën rëndë nga përmbytjet këtë javë, gjatë reshjeve të vazhdueshme sezonale të Jemenit që shkaktuan përmbytje që rrënuan shtëpitë e ndërtuara keq.

Autoritetet nuk kanë bërë të ditur numrin e përgjithshëm të vdekjeve të konfirmuara, apo numrin e përgjithshëm të personave të plagosur ose të zhdukur.

Sezoni i shirave në Jemen fillon në fund të marsit dhe shirat intensifikohen nga korriku deri në mes të gushtit.

Zyra humanitare e OKB-së në Jemen tha të mërkurën pasdite  se përmbytjet e së premtes në lagjen Maqbnah në qytetin Taiz vranë 15 njerëz, shkatërrun  tokat bujqësore, dëmtuan shtëpitë dhe infrastrukturën gjithashtu.

Disa banorë thuhet se kanë mbetur të bllokuar brenda shtëpive të tyre në distriktin al-Mansuriyah, që nga mbrëmja e së martës pasi rrugët janë bllokuar.

Autoritetet lokale ende nuk kanë arritur në zonat e prekura rëndë nga përmbytjet për dy ditë, duke lënë disa banorë të bllokuar brenda shtëpive të tyre, sipas dëshmitarëve që folën me Associated Press.

Mahdi al-Mashat, kryetar i Këshillit të Lartë Politik, urdhëroi autoritetet lokale që të përgjigjen ndaj zonave të dëmtuara, sipas Masirah TV, i cili raportoi se përmbytjet shkaktuan "dëme të mëdha në prona, toka dhe rrugë" në Hodeidah.

Dëshmitarët e përshkruan skenën në fushën bregdetare Tihamah të Jemenit, si të tmerrshme. Mohamed Rassam tha se disa bagëti u gjetën të ngordhura, pasi u mbytën në baltë për shkak të përmbytjeve. Furnizimet ushqimore dhe uji i pijshëm gjithashtu humbën.

"Përmbytjet fshinë gjithçka," tha ai.

Disa banorë u bllokuan brenda shtëpive të tyre në Tihamah, një rajon që është pjesë e Hodeidah. Të tjerët mundën të largoheshin dhe u nisën për në qytetin Hodeidah.

Shumë prej shtëpive në Tihamah, ku është raportuar kequshqyerja, janë bërë me tulla dhe materiale që mund të shkatërrohen lehtësisht nga shiu.

“Ne kemi mbetur të bllokuar nën shi, pasi erërat e forta dëmtuan shtëpinë tonë, e cila është një kasolle ku jetonim unë dhe shtatë fëmijët e mi. Autoritetet nuk dhanë kurrë asnjë ndihmë”, tha Ahmed Ayesh.

Ndërkohë, Khaled Mesëat tha se njerëzit në komunitet dëgjojnë vetëm për ndihmë humanitare dhe shërbime emergjente, por kurrë nuk marrin asnjë. Ai tha se të paktën tre persona u përfshinë nga përmbytjet, ndërsa të moshuarit vdiqën nga uria dhe të ftohtit.

“Mund të them se qindra shtëpi të ndërtuara me kashtë në Tihamah janë përfshirë nga përmbytjet gjatë 24 orëve të fundit”, tha Faree Hamdan.

Fondi i Kombeve të Bashkuara për Popullsinë-Jemen tha këtë javë në platformën e mediave sociale X,  se përmbytjet prekën më shumë se 28,000 njerëz që jetojnë në katër rrethe në qytetin Hajjah.

Ekipet e reagimit të shpejtë të udhëhequra nga agjencia kanë kryer operacione vlerësimi dhe reagimi dhe kanë regjistruar rreth 4,112 familje që kanë nevojë për ndihmë emergjente, sipas agjencisë.

Lufta civile shkatërruese e Jemenit filloi në vitin 2014,  kur Houthis pushtuan kryeqytetin e Sanaa dhe pjesën më të madhe të Jemenit verior dhe detyruan qeverinë e njohur ndërkombëtarisht në meërgim të tërhiqej. Një koalicion i udhëhequr nga Arabia Saudite, përfshirë Emiratet e Bashkuara Arabe, ndërhyri vitin e ardhshëm në përpjekje për të rivendosur qeverinë në pushtet.