Një fluturim i “Singapore Airlines” nga Londra Heathrow në Singapor ka bërë së fundmi bujë nga turbulencat e forta ku për pasojë një pasagjer u vra dhe 30 të tjerë u plagosën.

Turbulencat e rënda të papritura nuk janë vetëm një kërcënim për pasagjerët dhe ekuipazhin, por edhe për sigurinë afatgjatë të avionëve që i transportojnë ato, sipas studiuesve që thonë se ky fenomen është në rritje.

Megjithëse mund të mos keni hasur kurrë në një rast turbulence të rëndë gjatë një fluturimi, një studim projekton që udhëtarët ajror ka të ngjarë të përballen me turbulenca më të rrezikshme në vitet e ardhshme për shkak të ndryshimeve klimatike.

Shumica e rasteve të turbulencës përjetohen vetëm si një lëkundje e lehtë në avion dhe një humbje e lehtë e lartësisë. Sidoqoftë, në raste më të rralla, më të rënda, pasagjerët dhe anëtarët e ekuipazhit mund të lëndohen.

Veçanërisht e rrezikshme është ajo që njihet si “turbulenca e ajrit të pastër”, pasi kjo shpesh ndodh pa ndonjë paralajmërim të avancuar me fjalë të tjera pa asnjë shans për të lidhur rripin e sigurimit.

“Kjo formë turbulence është e rrezikshme për avionët dhe parashikohet të intensifikohet në përgjigje të ndryshimeve klimatike në të ardhmen”, thonë autorët e një studimi të vitit 2023 nga Universiteti Reading në MB.

Në vitin 1979, turbulenca e pastër e ajrit arriti në 467 orë mbi Atlantikun e Veriut, ndërsa në vitin 2020 shifra ishte 547 orë, thonë studiuesit.

“Çdo minutë shtesë e shpenzuar duke përshkuar turbulencat shkakton lodhje dhe rrit konsumimin e kornizës së avionit”, shkruajnë autorët e studimit.