Kryeprokurori i Gjykatës Ndërkombëtare Penale (GJNP) po kërkon urdhër-arresti për kryeministrin izraelit Benjamin Netanyahu dhe liderin e Hamasit në Gaza, Yahya Sinwar. Bëhet fjalë për një seri akuzash shkatërruese

Nga Jeremy Bowen, BBC

Linjave të gjuhës së kujdesshme ligjore i shtohen një sërë akuzash shkatërruese kundër tre liderëve më të shquar të Hamasit dhe kryeministrit dhe ministrit të mbrojtjes të Izraelit.

Një panel gjyqtarësh në GJNP tani do të shqyrtojë nëse do të lëshojë urdhër-arrestet. Shtetet që kanë nënshkruar statutin e GJNP-së do të detyroheshin më pas t'i arrestonin personat në fjalë nëse do të kishin mundësi.

124 nënshkruesit nuk përfshijnë Rusinë, Kinën dhe SHBA-në. As Izraeli nuk ka nënshkruar. Por GJNP ka vendosur se ka autoritet ligjor për të ndjekur penalisht aktet e krimive të luftës, sepse palestinezët janë nënshkrues.

Prokurori i GJNP-së pretendon se kryeministri izraelit dhe ministri i mbrojtjes kanë kryer krime, duke përfshirë vrasjen e civilëve nga uria si një armë lufte, vrasje, shfarosje dhe sulme të qëllimshme ndaj civilëve.

Nëse urdhër-arrestet lëshohen, kjo do të thotë se kreu i qeverisë izraelite, Benjamin Netanyahu, kryeministri i tij më jetëgjatë, nuk do të jetë në gjendje të vizitojë aleatët e tij perëndimorë pa rrezikuar arrestimin.

Përjashtimi i vetëm, gjithsesi i rëndësishëm për të, do të ishin Shtetet e Bashkuara.

E njëjta gjë do të vlejë edhe për Yoav Gallant, ministri i mbrojtjes i Izraelit. Fjalët që ai përdori kur njoftoi se Izraeli do të rrethonte Gazën janë cituar shpesh nga kritikët e sjelljes së Izraelit. Dy ditë pas sulmeve të Hamasit më 7 tetor, Gallant tha: “Kam urdhëruar një rrethim të plotë në Rripin e Gazës. Nuk do të ketë energji elektrike, ushqim, karburant, gjithçka është e mbyllur... ne po luftojmë kafshët njerëzore dhe po veprojmë në përputhje me rrethanat”.

Prokurori i GJNP-së, Karim Khan, i cili është edhe këshilltar i mbretit britanik, shkruan në deklaratën e tij se “Izraeli ka privuar qëllimisht dhe sistematikisht popullsinë civile në të gjitha pjesët e Gazës nga objektet e domosdoshme për mbijetesën njerëzore".

Krimet e luftës, që Khan thotë se kreu Hamasi, përfshijnë shfarosje, vrasje, pengmarrje, përdhunim dhe torturë.

Dy nga liderët e akuzuar të Hamasit - Yahya Sinwar, kreu i Hamasit në Gaza dhe Mohammed Deif (i referuar nga GJNP si Mohammed al-Masri) komandanti i krahut ushtarak të Hamasit, Brigadat Qassam - besohet se fshihen diku brenda Gazës.

Izraeli është përpjekur t'i vrasë ata gjatë shtatë muajve të fundit, kështu që një urdhër-arresti nuk i shton shumë presionet ndaj tyre. Por lideri tjetër i Hamasit që përballet me një urdhër është Ismail Haniyeh, kreu i byrosë politike të Hamasit.

Ai udhëton gjerësisht në rajon dhe ka takime me udhëheqës të lartë arabë dhe iranianë. Haniyeh është i vendosur në Katar, i cili ashtu si Izraeli, nuk nënshkroi Statutin e Romës që krijoi GJNP-në.