Një alarm është ngritur në Stokholm pasi oficerët në një makinë patrullimi thanë se kishin dëgjuar të shtëna armësh pranë ambasadës izraelite.

“Një oficer patrulle në Strandvagen në Stokholm dëgjoi tinguj të fortë dhe vlerësoi se ishin të shtëna armësh”, tha policia në faqen e saj të internetit, duke shtuar se zona e rrethuar është midis urës Djurgarden, Nobelparken dhe kishës Oskar Fredrik.

Shumë persona janë arrestuar dhe ka nisur hetimi, sqaron policia.

Në kuadër të hetimeve në vendngjarje, “janë evidentuar gjetje që forcojnë dyshimet se ka pasur të shtëna”, theksoi i njëjti burim.

Agjencia suedeze e lajmeve TT raportoi se policia nuk pranoi të komentonte nëse kishte një lidhje midis incidentit dhe ambasadës izraelite.