Banska Bystrica, Sllovaki - Politikanët sllovakë kanë bërë thirrje për qetësi në vend pasi kryeministri Robert Fico u qëllua disa herë nga një vrasës i mundshëm të mërkurën, një rast i rrallë i dhunës politike që i nxiti të kërkonin në thellësi të shpirtit në një shoqëri thellësisht të ndarë.

Fico ishte në gjendje të rëndë, por të qëndrueshme të enjten, tha një zyrtar i spitalit, pasi lideri populist u qëllua disa herë në një tentativë për t’i marrë jetën, e cila tronditi vendin e vogël dhe bëri jehonë në të gjithë kontinentin pak javë përpara zgjedhjeve evropiane.

Një i dyshuar u fut në paraburgim dhe ministri i Brendshëm Matus Sutaj Estok tha të mërkurën se një hetim fillestar zbuloi "një motivim të qartë politik" pas sulmit ndaj Ficos, ndërkohë që ai po merrte pjesë në një mbledhje të qeverisë në një ish-qytet të minierave të qymyrit.

Ministri nuk specifikoi se cili ishte motivi. Fico ka qenë prej kohësh një figurë përçarëse në Sllovaki dhe më gjerë, dhe kthimi i tij në pushtet vitin e kaluar me një mesazh pro-rus, anti-amerikan çoi në shqetësime edhe më të mëdha midis anëtarëve të tjerë të Bashkimit Evropian se mos ai do ta braktiste kursin pro-perëndimor të vendit të tij.

Përpjekja për të vrarë Fico erdhi në një kohë të ndarjes së madhe në Sllovaki, pasi mijëra demonstrues janë mbledhur vazhdimisht në kryeqytet dhe në mbarë vendin për të protestuar ndaj politikave të tij. Ajo gjithashtu vjen pak përpara zgjedhjeve të qershorit për Parlamentin Evropian.

Presidentja e Sllovakisë në largim dhe ai i ardhshëm - rivalë politikë - u shfaqën së bashku në një apel për sllovakët që të kapërcejnë dallimet e tyre politike gjithnjë e më të tensionuara për të mirën e vendit.

Presidentja në largim Zuzana Caputova, një kundërshtare e Fico, tha të enjten se krerët e partive politike të vendit do të takohen në një përpjekje për të sjellë qetësi, duke thënë se sulmi ishte një reflektim i një shoqërie gjithnjë e më të polarizuar.

"Le të dalim nga rrethi vicioz i urrejtjes dhe akuzave të ndërsjella," tha Caputova në një konferencë shtypi në kryeqytetin Bratislavë. “Ajo që ndodhi dje është një akt individual. Por atmosfera e tensionuar e urrejtjes është vepër jona e përbashkët”.

Presidenti i sapozgjedhur Peter Pellegrini u bëri thirrje partive politike të pezullojnë ose të zvogëlojnë fushatat për zgjedhjet evropiane, të cilat do të mbahen më 6-9 qershor, për të parandaluar “përplasjet dhe akuzat e ndërsjella mes politikanëve”.

“Nëse ka diçka për të cilën populli i Sllovakisë ka nevojë urgjente sot, kjo është të paktën marrëveshja themelore dhe uniteti midis përfaqësimit politik sllovak. Dhe nëse s'ka konsensus, atëherë ju lutem, të paktën mënyra të civilizuara për të diskutuar mes njëri-tjetrit”, tha Pelligrini.

Qeveria e Ficos, e zgjedhur shtatorin e kaluar, ka shkaktuar polemika duke ndaluar dërgesat e armëve në Ukrainë dhe ka plane të ndryshojë kodin penal për të eliminuar një prokuror të posaçëm kundër korrupsionit dhe për të marrë kontrollin e medias publike. Kritikët  shqetësohen se ai do ta udhëheqë Sllovakinë – një komb prej 5.4 milionë banorësh që i përket NATO-s – në një rrugë më autokratike.

Zuzana Eliasova, një banore e kryeqytetit Bratislavë, tha se sulmi ndaj Fico ishte një "tronditje" për kombin dhe një sulm ndaj demokracisë në një kohë kur tensionet politike ishin tashmë të larta.