Kryetarja e Fondit Monetar Ndërkombëtar , Kristalina Georgieva, do të kandidojë për një mandat të dytë pesë-vjeçar pasi u propozua nga një sërë vendesh evropiane për të udhëhequr huadhënësin global.

Ekonomistes bullgare do t’i jepet mbështetja e vendit të saj, i cili tha se ajo kishte pranuar emërimin për një mandat tjetër duke filluar nga shtatori.

Bruno Le Maire, ministri francez i financave, tha fundjavën e kaluar në një takim të samitit të G20 se Georgieva kishte bërë një “punë të madhe” duke udhëhequr institucionin dhe se Franca do ta mbështeste atë për një mandat të dytë.

Dimitar Radev, guvernatori i bankës qendrore të Bullgarisë, tha se ajo kishte fituar “respektin dhe besimin e madh” të vendeve anëtare të FMN-së gjatë pesë viteve të saj të para në organizatën me bazë në Uashington.

Ministrat e financave nga Spanja, Polonia dhe Holanda pritet të bashkohen me Bullgarinë dhe Francën në mbështetjen e Georgievës. Mbështetja e vendeve evropiane, e cila pritet të përfshijë Mbretërinë e Bashkuar, do të jetë vendimtare për rizgjedhjen e saj, duke pasur parasysh se vendet evropiane tradicionalisht emërojnë një kandidat për të udhëhequr FMN-në, megjithëse të gjithë anëtarët e Bashkimit Evropian duhet të bien dakord raporton The Guardian. Vendimi përfundimtar merret nga bordi drejtues i institucionit.

Georgieva, e cila do të jetë 71 vjeç në gusht, ishte shefe ekzekutive e Bankës Botërore nga viti 2017 përpara se të largohej për postin kryesor të FMN-së në tetor 2019.