Punonjësi i një kopshti zoologjik në një universitet në Nigeri humbi jetën në mënyrë tragjike pasi u sulmua nga një prej luanëve për të cilët ishte kujdesur prej më shumë se 10 vitesh.

Olabode Olawuyi ishte përgjegjës për kopshtin zoologjik në universitetin “Obafemi Awolowo”, dhe u sulmua nga predatorët teksa ishte duke i ushqyer.

Në një reagim për mediat, universiteti bën me dije se kolegët e tij reaguan menjëherë, por nuk mundën të bënin gjë pasi kishte marrë një plagë fatale. Menjëherë, kafsha që vrau punonjësin, u ekzekutua.

Kreu i sindikatës së studentëve të universitetit, Abbas Akinremi, i tha gazetës Vanguard se sulmi ishte pasojë e një "gabimi njerëzor" pasi kujdestari i kopshtit zoologjik kishte harruar të mbyllte derën pasi ushqeu luanët.