Një incident i papritur shtyu kthimin e kreut të diplomacisë amerikane, Anthony Blinken, në SHBA nga Zvicra, ku mori pjesë në Forumin Ekonomik Botëror që po mbahet në Davos.

Sekretari amerikan i Shtetit dhe shoqëruesit janë nisur me helikopter nga resorti zviceran. Më pas ata hipën në Boeing 737, por u tha se avioni konsiderohej i pasigurt për fluturim për shkak të një rrjedhje oksigjeni, sipas agjencisë së lajmeve Reuters.

Blinken u detyrua të ndërrojë aeroplan për t’u kthyer në Uashington, shkruan CNN.

Kjo është goditja e fundit për reputacionin e Boeing. Kujtohet se më 5 janar, në një aeroplan të Alaska Airlines, një pjesë e tij  u shkëput pas ngritjes dhe ndërsa ishte në qiell, duke lënë një vrimë të madhe.

Fatmirësisht askush nuk ishte ulur në sediljen ngjitur me vrimën dhe nuk pati lëndime serioze. Por incidenti çoi në tokëzimin e përkohshëm të të gjithë avionëve 737 Max 9 pasi linjat ajrore u urdhëruan t’i inspektonin ata për montim të mundshëm të defekteve dhe bulonave të liruar ose të humbur.

Ndërsa shkaku i këtij aksidenti është ende nën hetim, CEO i Boeing, Dave Calhoun pranoi se një “gabim” i kompanisë çoi në incident.

Avioni në fjalë i Alaska Airlines është një version më i ri i 737 sesa ai me të cilin ishte planifikuar të fluturonte Blinken, i cili është një model më i vjetër i modifikuar për përdorim nga ushtria. Por versioni më i ri i 737, 737 Max, pati një sërë problemesh serioze shumë kohë përpara incidentit të Alaska Airlines  këtë muaj.