Ndërkohë që lufta po hyn në muajin e tretë, tanket izraelite po përparojnë në qendër të qytetit Khan Younis në Gaza, në vendlindjen e Komandantit të Përgjithshëm të krahut ushtarak të Hamasit, Mohammed Dief si edhe të liderit të lëvizjes, Yahya Sinëar, për të cilin Izraeli beson se është organizatori i sulmit të 7 tetorit.

Luftimet në veri po përqendrohen në një bastion tjetër të Hamasit, në Jabalia si dhe në lagjet e qytetit të Gazës, Zaytoun, Shejaiya, Al-Daraj dhe Al-Tuffah.

Lufta ka hyrë në fazën më të rëndësishme dhe komplekse, pasi tanket i afrohen tre bastioneve më të rëndësishme të Hamasit, Khan Younis, Jabalia dhe Shuja'iya.

Shumë besojnë se Hamasi ka më shumë forcë ushtarake atje dhe do të jetë më në gjendje të përballet me trupat izraelite në bastionet e veta.

Qindra mijëra civilë ende jetojnë në ato zona dhe mundësia e goditjes së shumë viktimave civile është shumë e lartë.

Situata humanitare është një katastrofë. Shumica e mallrave bazë nuk janë në dispozicion dhe shumica e ujit për konsum nuk është ujë i pijshëm.

Neven Hassan, nënë e pesë fëmijëve, tha: “Ne hamë një vakt në ditë - kryesisht një copë bukë dhe fasule të konservuara.

“Nuk gjej qumësht për fëmijën tim gjashtë muajsh, të gjitha vajzat dhe djali im janë të sëmurë, pinë ujë të pistë dhe nuk gjejmë asnjë batanije për të përballuar motin e ftohtë”.

Ajo tha se rënia e ndjeshme e temperaturave e bën më të vështirë, pasi shumica e popullsisë jeton në tenda primitive dhe nuk ka veshje të përshtatshme apo strehim të përshtatshëm.

​