Shkencëtarët në Zelandën e Re kanë raportuar se vrima e ozonit mbi Antarktidë ka qenë "tejet e madhe" gjatë katër viteve të fundit, më e madhe dhe më e thellë se kurrë më parë. Me gjithë ndalimin global të prodhimit të klorofluorokarboneve (CFC) – kimikate të prodhuara nga njeriu që dihej se hollojnë shtresën e ozonit – zgjerimi i vrimës së ozonit ka ngritur shqetësime, shkruan Daily Mail.

Matjet e fundit treguan një humbje prej 26% në bërthamën e vrimës së ozonit gjatë 19 viteve të fundit, edhe pse një raport i OKB-së në fillim të vitit sugjeroi që shtresa e ozonit mund të korrigjohej deri në vitin 2040 për shkak të ndalimit të CFC.

Studimi, i kryer nga ekspertët në Universitetin e Otagos, analizoi ndryshimet mujore dhe ditore të ozonit në lartësi dhe gjerësi të ndryshme brenda vrimës së ozonit nga viti 2004 deri në vitin 2022. Vrima e ozonit, e matur në 26 milionë km katror në shtator, ka tejkaluar përmasat e tre viteve të mëparshme. Shkencëtarët vunë re jo vetëm një zonë më të madhe, por edhe thellësi të shtuar gjatë pjesës më të madhe të pranverës.

Ndërsa shtresa e ozonit mbron nga rrezet e dëmshme ultravjollcë, vrima e ozonit në zgjerim lejon më shumë rrezatim ultravjollcë të arrijë në sipërfaqen e Tokës. Ky fenomen mund të lidhet me ndryshimet në atmosferën e Hemisferës Jugore, me shumë gjasa të lidhura me vorbullën polare, një model qarkullimi atmosferik në stratosferën mbi pole.

Studimi ngre shqetësime në lidhje me ndikimin e vrimës së ozonit në klimën e Antarktikut, duke përfshirë shkrirjen e akullit dhe kontributin në rritjen e nivelit të ujit, duke theksuar nevojën për kërkime të mëtejshme mbi shkaqet e zgjerimit të vrimës së ozonit përtej ndikimit të CFC-ve.