Një dron ka goditur një ndërtesë në qendër të Moskës që ishte në ndërtim e sipër, tha kryebashkiaku Sergei Sobyanin.

Mbrojtja ajrore gjithashtu rrëzoi dy dronë në rrethet Mozhaisk dhe Khimki të rajonit të Moskës, shtoi ministria ruse e Mbrojtjes.

Nuk ka raportime për viktima dhe nuk është e qartë se kush e kreu sulmin.

Zyrtarët rusë e përshkruan atë si "një përpjekje tjetër nga regjimi i Kievit për të kryer një sulm terrorist".

Ukraina zakonisht nuk komenton se kush qëndron pas sulmeve brenda territorit rus.

Të gjitha fluturimet u pezulluan drejt dhe nga aeroportet e Moskës herët të mërkurën, por më vonë u kthyen në funksionim normal. Masat e pezullimit të fluturimeve janë marrë vazhdimisht gjatë ditëve të fundit.

Kjo ishte nata e gjashtë radhazi e sulmeve ajrore në rajonin e kryeqytetit të Rusisë, raportoi agjencia e lajmeve AFP.

Droni që goditi ndërtesën në ndërtim në kompleksin e qytetit të Moskës ishte goditur nga sistemet e luftës elektronike, tha ministria e Mbrojtjes. Ai humbi kontrollin dhe u përplas me ndërtesën, shtoi ai.

Disa xhama u thyen në dy ndërtesa pesëkatëshe përballë dhe shërbimet e urgjencës po inspektonin zonën, shtoi kryebashkiaku.

Në përgjigje të raporteve për dronët e rrëzuar, Departamenti Amerikan i Shtetit tha se Uashingtoni nuk i  inkurajon sulmet me dronë në Rusi.

Zyrtarët amerikanë shtuan se i takon Ukrainës të vendosë se si të mbrohet dhe se Rusia mund t'i japë fund luftës në çdo kohë duke u tërhequr nga fqinji i saj.

Gjithashtu gjatë natës, tre të moshuar u vranë nga bombardimet ruse pranë qytetit lindor të Ukrainës, Lyman, thanë zyrtarët.

Pretendimet për sulme me dron brenda Rusisë janë bërë gjithnjë e më të zakonshme muajt e fundit.

Të martën, ministria ruse e Mbrojtjes tha se kishte rrëzuar dy drone mbi rajonin e Moskës dhe dy të tjerë u kapën mbi rajonin Bryansk pranë kufirit me Ukrainën.

Sobyanin tha se mbrojtja ajrore ruse kishte rrëzuar dy drone në perëndim të kryeqytetit në rajonet Krasnogorsk dhe Chastsy. Nuk raportohet për të lënduar.

Ministria tha gjithashtu se një avion luftarak rus kishte shkatërruar një anije zbulimi ukrainase në Detin e Zi që lundroi pranë objekteve të prodhimit të gazit rus të martën.

Ukraina nuk mori përgjegjësinë për ndonjë inkursion me dron të martën - por presidenti Volodymyr Zelensky ka thënë më parë se sulmet në territorin rus janë një "proces i pashmangshëm, i natyrshëm dhe absolutisht i drejtë".