Mbikëqyrja e zgjedhjeve në Mbretërinë e Bashkuar ka zbuluar se ka qenë viktimë e një “sulmi kompleks kibernetik” që mund të prekë miliona votues. Komisioni Zgjedhor tha se “aktorë armiqësorë” të paspecifikuar kishin arritur të kishin akses në kopjet e regjistrave zgjedhorë, nga gushti 2021.

Hakerët gjithashtu depërtuan në e-mailet dhe “sistemet e kontrollit”, por sulmi nuk u zbulua deri në tetor të vitit të kaluar.

Mbikëqyrësi ka paralajmëruar njerëzit që të kenë kujdes nga përdorimi i paautorizuar i të dhënave të tyre. Në një njoftim publik, komisioni tha se hakerët kishin akses në kopjet e regjistrave që ai mbante për qëllime kërkimore dhe për të kryer kontrolle mbi donatorët politikë.

Sipas tij informacioni që kishte në kohën e sulmit përfshinte emrat dhe adresat e njerëzve në Mbretërinë e Bashkuar që u regjistruan për të votuar midis 2014 dhe 2022.

Komisioni thotë se është e vështirë të parashikohet saktësisht se sa njerëz mund të preken, por ai vlerëson se regjistri për çdo vit përmban detajet e rreth 40 milionë njerëzve.

Shefi ekzekutiv Shaun McNally tha se ai e kupton shqetësimin e publikut dhe do të donte t’u kërkonte falje të prekurve.

Komisioni shtoi se kishte ndërmarrë hapa për të siguruar sistemet e tij kundër sulmeve të ardhshme, duke përfshirë përditësimin e kërkesave të tij për hyrje, sistemin e alarmit dhe politikat e murit të zjarrit.

Zyra e Komisionerit të Informacionit, e cila është përgjegjëse për mbrojtjen e të dhënave në Mbretërinë e Bashkuar tha se kishte nisur urgjentisht hetimet.

Ndërhyrja e hakerëve në zgjedhje është një nga frikërat më të mëdha të botës demokratike. Për fat të mirë, komisioni thotë se në këtë rast, ndërhyrësit kibernetikë nuk kanë pasur ndikim në asnjë zgjedhje, apo statusin e regjistrimit të askujt.