Me thënien “plehrat e dikujt janë thesar për dikë tjetër” u bind një tregtar antik pasi bleu një shtëpi në një gjendje kaotike dhe më pas gjeti sende me vlerë rreth 270 mijë euro në grumbujt e gjërave. Alex Archbold, i cili zotëron një dyqan antik në Edmonton, Alberta, Kanada, dhe drejton një kanal të njohur në YouTube me qindra mijëra ndjekës, bleu shtëpinë dhe sendet e mësueses të ndjerë të muzikës, Beth-Joan Ruck.

“Më thanë se kishte të ardhura modeste dhe nuk prisja shumë”, tha ky kanadez për Bored Panda. Mirëpo, siç thotë ai, kur ka hyrë për herë të parë në shtëpi ka mbetur i befasuar nga gjendja e saj. “Ishte një rast ekstrem i grumbullimit”, tha Archbold. Ai e bleu shtëpinë vetëm për një arsye. “Unë në fakt e bleva shtëpinë dhe gjëra të tjera vetëm sepse mendova se mund të ishte një aventurë argëtuese për kanalin tonë në YouTube dhe të paktën do të merrja një piano. Nuk mund të shihej se çfarë kishte në shtëpi, sepse në atë moment ishte plot me gjëra. Grumbujt ndonjëherë ngjiteshin deri në tavan”, deklaroi ai.

Së bashku me gruan dhe fëmijët e tij, YouTuber-i ka “krehur” shtëpinë në kërkim të çdo gjëje që mund të shiste dhe u habit menjëherë kur hasën në shufra argjendi, të fshehura në një grumbull letrash. Sipas Archbold, kjo ishte vetëm maja e ajsbergut. “Kemi gjetur kuleta plot me para të gatshme, një shufër argjendi me peshë gati tre kilogramë dhe çanta plot me unaza ari dhe diamanti”, tha ai. Ankandi fillestar i solli atij gati 200 mijë dollarë, zbuloi ai. Archbold pret të marrë të paktën 100 mijë dollarë të tjerë deri në kohën kur shtëpia të jetë plotësisht e zbrazur.

Ai dhe familja gjetën gjithashtu disa kuti me veshje nga shtëpi luksoze të modës si Chanel, Burberry dhe Tiffany. Përveç kësaj, ata zbuluan dollapë të tërë plot me veshje vintage dhe stilistë që datojnë dekada më parë. Në shtëpi u zbuluan gjithashtu regjistrime të vjetra me vlerë, takëm antike, këpucë, libra dhe të paktën tre makina qepëse. “Gjithçka ka potencial këtu. Ky ishte investimi më i mirë që kam bërë ndonjëherë”, shpjegoi Archbold. Ky i fundit zbuloi se e ka mbajtur pianon për vete dhe shpreson ta transferojë në një kafene që planifikon të hapë pranë dyqanit të tij ekzistues.