Tanket e prodhimit të huaj do të jenë një “objektiv prioritar” për ushtrinë ruse në Ukrainë, tha të enjten presidenti Vladimir Putin.

Në një intervistë të transmetuar në televizionin shtetëror, Putin pohoi se furnizimet me armë perëndimore nuk do ta ndryshojnë rrjedhën e luftës, duke shtuar se anëtarësimi i Ukrainës në NATO kërcënon sigurinë e vendit të tij.

Putin fajësoi aleancën ushtarake për përshkallëzimin dhe zgjatjen e mëtejshme të tensioneve midis palëve ndërluftuese.

Duke kritikuar vendimin e Francës për të furnizuar Ukrainën me raketa me rreze të gjatë veprimi, ai tha se Ukraina nuk do të ketë ndonjë përfitim të rëndësishëm nga armët e reja.

“Po, ato shkaktojnë dëme, por asgjë thelbësore nuk ndodh në zonën e luftës me përdorimin e tyre”, shtoi ai.

Edhe pse vendet kanë të drejtë të forcojnë sigurinë e brendshme, kjo nuk duhet të bëhet me koston e një vendi tjetër, tha Putin.

Komentet e tij pasuan pretendimin e presidentit amerikan Joe Biden se Kremlini "tashmë e kishte humbur luftën".

“Nuk ka asnjë mundësi që ai të fitojë luftën në Ukrainë”, tha Biden të enjten në vizitën e tij të parë në Helsinki që kur Finlanda u bashkua me NATO-n.

Biden mbështeti gjithashtu anëtarësimin e Ukrainës në NATO, duke siguruar se "fjala është se kur mund të anëtarësohen" dhe jo "nëse duhet apo nuk duhet të anëtarësohen".

Pentagoni thotë se municionet thërrmuese kanë mbërritur në Ukrainë

Municionet thërrmuese të ofruara nga Shtetet e Bashkuara kanë mbërritur tashmë në Ukrainë, tha Pentagoni të enjten.

Bombat - të cilat hapen në ajër dhe lëshojnë shumë bomba më të vogla - shihen nga Uashingtoni si një mënyrë për të forcuar ofensivën e Kievit dhe për të thyer vijën e frontit rus.

Megjithatë, vendimi është kritikuar gjerësisht nga politikanët amerikanë, aleatët e NATO-s dhe grupet e të drejtave, pasi armët e ndaluara gjerësisht janë të njohura për natyrën e tyre pa dallim dhe vrasjen e civilëve edhe shumë kohë pas përfundimit të një konflikti.

Udhëheqësit amerikanë debatuan për çështjen e mprehtë për muaj të tërë përpara se Presidenti Joe Biden të merrte vendimin përfundimtar javën e kaluar.

Udhëheqësit amerikanë kanë thënë se vendi do të dërgojë një version të municionit që ka një "shkallë të reduktuar".

Uashingtoni ka thënë se do të sigurojë mijëra municione thërrmuese, por nuk ka dhënë numra specifikë.

Nuk është e qartë se kur do të fillojnë t'i përdorin trupat ukrainase.