Shkrimtarja ukrainase e vlerësuar me çmime dhe studiuese e krimeve të luftës, Victoria Amelina ka vdekur nga plagët e marra pasi një raketë ruse goditi një restorant picash në qytetin lindor të Kramatorsk të martën.

Amelina bëhet personi i 13-të që vdes nga ky sulm.

Shoqata e shkrimtarëve PEN Ukraine tha se mjekët "bënë gjithçka që mundën për të shpëtuar jetën e saj, por fatkeqësisht plaga ishte fatale".

Aktivistët e të drejtave të njeriut e kanë quajtur sulmin një krim lufte.

Kramatorsk është nën kontrollin e Ukrainës, por është afër vendeve të Ukrainës, të pushtuara nga forcat ruse.

Amelina, 37 vjeçe, po darkonte me një delegacion gazetarësh dhe shkrimtarësh kolumbianë në sallën e njohur Ria Lounge të qytetit kur raketa goditi. Rreth 60 të tjerë u plagosën në sulm.

Ajo u dërgua me urgjencë në spitalin në Dnipro, tha PEN Ukraine.

“Me dhimbje të madhe ju informojmë se zemra e shkrimtares Victoria Amelina pushoi së rrahuri më 1 korrik”, thuhet në një deklaratë të grupit.

“Në ditët e fundit të jetës së Viktorias, familja dhe miqtë e saj ishin pranë saj”.

Amelina ishte një nga shkrimtaret e reja më të famshme të Ukrainës, e cila filloi të dokumentonte krimet e luftës pas pushtimit të plotë të Rusisë vitin e kaluar. Ajo gjithashtu filloi të punojë me fëmijët pranë vijës së frontit.

Vitin e kaluar ajo zbuloi ditarin e shkrimtarit për fëmijë Volodymyr Vakulenko, i cili u rrëmbye dhe u vra nga trupat ruse në qytetin e Izyum menjëherë pas pushtimit.

Libri i saj i parë jo-fiction në anglisht, War and Justice Diary: Looking at Women Looking at War, pritet të botohet.

Në një deklaratë të mëparshme që konfirmonte se Amelina ishte plagosur në sulm, PEN Ukrainë dhe mbikëqyrësi i krimeve të luftës Truth Hounds thanë se anëtarët e të dy grupeve kishin udhëtuar në vijën e frontit me Amelinën.

"Tani, Victoria është një viktimë e një krimi lufte," thanë ata.

Një postim i ngjitur në profilin e saj në Twitter tregon Amelinan duke bërë një foto të një ndërtese të bombarduar në Ukrainë.

“Jam unë në këtë foto”, thuhet në postim.

"Unë jam një shkrimtare ukrainas. Kam portrete të poetëve të mëdhenj ukrainas në çantën time. Duhej të bë ja fotografi të librave, artit dhe djalit tim të vogël. Por unë po dokumentoj krimet e luftës të Rusisë dhe dëgjoj zhurmën e granatimeve, jo poezi. Pse?"