Beograd, Serbi  - Presidenti i Serbisë premtoi të mërkurën zgjedhje të parakohshme parlamentare, në një përpjekje të dukshme për të shuar protestat e mëdha kundër sundimit të tij populist pas dy masakrave që e tronditën kombin.

Në një fjalim drejtuar kombit, presidenti Aleksandër Vuçiç tha se votimi do të bëhej "deri në fund të këtij viti", njofton AP.

“Tani është e qartë se do të kemi zgjedhje të parakohshme parlamentare”, tha Vuçiç, i rrethuar nga aleatja e tij e ngushtë politike, kryeministrja Ana Brnabiç.

“Unë jam gati të jap dorëheqjen, dorëheqja ime është në tryezë”, tha Brnabiç.

Shumica e partive opozitare e kanë refuzuar mbajtjen e zgjedhjeve ndërkohë që Vuçiç mban një kontroll të fortë në të gjitha levat e pushtetit, duke përfshirë mediat kryesore, të cilat kanë qenë pothuajse plotësisht nën kontrollin e tij.

Dhjetëra mijëra njerëz protestuan në kryeqytetin e Serbisë, Beograd, edhe pse Vuçiç hodhi poshtë çdo përgjegjësi për krizën dhe i injoroi kërkesat e protestuesve për të dhënë dorëheqjen.

Ai tha se protestuesit po i përdornin masakrat për të ardhur në pushtet pa zgjedhje, duke thënë se edhe nëse kjo nënkupton vrasjen e tij dhe familjes së tij.

Protestuesit e opozitës kanë kërkuar dorëheqjen e zyrtarëve të lartë të qeverisë dhe heqjen e licencave të transmetimit të dy rrjeteve televizive pro-qeveritare, të cilat, thonë ata, promovojnë dhunën dhe lavdërojnë figurat e krimit.

Një protestë e re është planifikuar për këtë fundjavë në atë që po bëhet një sfidë gjithnjë e më serioze për Vuçiçin, ndoshta më e madhja me të cilën ai është përballur që nga ardhja në pushtet 11 vjet më parë.

Opozita e ka akuzuar Vuçiçin për nxitje të intolerancës dhe gjuhës së urrejtjes gjatë qeverisjes së tij gjithnjë e më autokratike, ndërsa ka marrë në mënyrë të paligjshme kontrollin e të gjitha institucioneve shtetërore. Vuçiç e ka mohuar këtë, duke pretenduar se grupet opozitare duan që ai të rrëzohet me forcë.

Dy masakra, më 3 dhe 4 maj , etronditën kombin, sepse e para ndodhi në një shkollë fillore në qendër të Beogradit, kur një djalë 13-vjeçar mori armën e babait të tij dhe hapi zjarr ndaj shokëve të tij. Tetë nxënës dhe një roje shkolle u vranë dhe shtatë të tjerë u plagosën. Një vajzë tjetër vdiq më vonë në spital nga plagët në kokë.

Një ditë më vonë, një 20-vjeçar përdori një armë automatike për të goditur  njerëz të rastit në dy fshatra në jug të Beogradit, duke vrarë tetë persona dhe duke plagosur 14 të tjerë.