Berlin – Ekstremistët e majtë, mbështetës të një gruaje të dënuar me burg se mori pjesë në sulmet kundër neonazistëve dhe ekstremistëve të tjerë, u përleshën me policinë gjermane në Laipzig gjatë fundjavës, duke lënë 50 oficerë dhe një numër protestuesish të plagosur.

Demonstrata e planifikuar e së shtunës mes mbështetësve të 28-vjeçares Lina E., emri i plotë i së cilës nuk u publikua për shkak të rregullave të privatësisë, u ndalua nga qyteti Leipzig, por Policia tha se rreth 1,500 protestues u shfaqën pavarësisht ndalimit.

Ajo që nisi si një tubim kryesisht paqësor përfundimisht çoi në përleshje midis protestuesve dhe policisë, në të cilat disa demonstrues hodhën gurë, shishe dhe fishekzjarre ndërsa policia u përpoq të spastronte zona të caktuara të qytetit.

Shefi i policisë së Leipzig, Rene Demmler tha të dielën se 50 oficerë dhe një numër protestuesish u plagosën, sipas agjencisë gjermane të lajmeve DPA.

Nuk ishte menjëherë e qartë se sa të rënda ishin lëndimet.

Autoritetet tani po i hetojnë individët për prishje të rëndë të qetësisë dhe sulm ndaj oficerëve të policisë. Rreth 30 persona u arrestuan, tha Demmler, dhe 40 deri në 50 të tjerë u arrestuan dhe u liruan të dielën pasdite.

Ministrja e Brendshme gjermane Nancy Faeser denoncoi disa veprime të dhunshme të protestuesve dhe u uroi oficerëve të plagosur shërim të shpejtë në një deklaratë të dielën.

“Asgjë nuk e justifikon dhunën e pakuptimtë të kaosit dhe trazirave ekstremiste të krahut të majtë,” tha ajo. “Kushdo që hedh gurë, shishe apo mjete ndezëse ndaj oficerëve të policisë duhet të mbajë përgjegjësi.”

Ndërkohë, disa politikanë kritikuan qasjen e policisë ndaj protestuesve, duke thënë se ishte agresive në mënyrë të panevojshme./ar.sh/SYRI.NET

Protestat erdhën si përgjigje ndaj vendimit të një gjykate shtetërore të Dresdenit të mërkurën për të dënuar Lina E. për anëtarësim në një organizatë kriminale dhe lëndime të rënda trupore. Ajo u dënua me pesë vjet e tre muaj burg.

Disa orë më vonë, gjykata tha se ajo ishte liruar në kushte të papërcaktuara pasi kishte kaluar rreth 2 vjet e gjysmë në paraburgim para vendimit.

Prokurorët e akuzuan studenten për "ideologji militante të së majtës ekstreme" dhe konceptimin e idesë së sulmeve ndaj individëve të ekstremit të djathtë në Laipzig dhe në qytetet përreth. Tre burra dyshohet se janë bashkuar me të. Gjykata në Dresden i dënoi ata me nga 27 muaj deri në 39 muaj burg.

Protestat e kësaj fundjave në Laipzig pasojnë demonstrata të ngjashme atje dhe në qytete të tjera përreth Gjermanisë, duke përfshirë Berlinin, Bremenin dhe Hamburgun, në ditët pas vendimit.

Një tjetër protestë, e cila gjithashtu është ndaluar nga qyteti, ishte paralajmëruar për mbrëmjen e së dielës.