Një shkencëtar i shquar rus i përfshirë në programin e raketave hipersonike të vendit ka dalë në gjyq i akuzuar për tradhti shtetërore mes fshehtësisë së rreptë dhe shqetësimeve për shëndetin e të pandehurit të moshuar.

Gjyqi i Anatoly Maslov u hap në Shën Petersburg të enjten, çështja e parë kundër tre shkencëtarëve të raketave hipersonike që punonin në një institut në qytetin siberian të Novosibirsk dhe që tani po përballen me atë që Kremlini ka thënë se janë "akuza shumë të rënda".

Gjyqi, i shënuar si “tepër sekret”, është i mbyllur për mediat dhe publikun, ka thënë gjykata e Shën Petersburgut. 

Avokati i Maslovit nuk mund të kontaktohej për të komentuar mbi hapjen e procedurës.

Një burim i afërt me Maslov, i tha agjencisë së lajmeve Reuters se shkencëtari i raketave kishte pësuar dy sulme në zemër dhe kishte kaluar kohë në spital që nga arrestimi i tij qershorin e kaluar në Novosibirsk.

Mjekët në qendrën e paraburgimit nuk i kanë dhënë Maslovit akses në të gjitha medikamentet e përshkruara nga mjeku i tij normal, tha burimi, duke shtuar: "Gjendja e tij nuk është shumë e mirë". Reuters nuk mundi të verifikonte në mënyrë të pavarur akuzën në lidhje me mohimin e mjekimit.

Maslov ishte profesor dhe studiues në Institutin e Mekanikës Teorike dhe të Aplikuar Khristianovich, një nga qendrat më të larta shkencore të Rusisë.

Të tre të pandehurit janë specialistë të hipersonikës – një fushë me rëndësi kyçe për zhvillimin e gjeneratës së ardhshme të raketave ruse, të afta të fluturojnë me 10 herë shpejtësinë e zërit.

Kolegët në Institutin Khristianovic publikuan një letër të hapur më 15 maj në mbështetje të tre shkencëtarëve të burgosur që dëshmonin për pafajësinë dhe patriotizmin e tyre, duke vënë në dukje se të akuzuarit kishin shmangur mundësinë e punëve me pagesë të lartë jashtë shtetit për t'iu përkushtuar "shërbimit të shkencës ruse".

“Ne e njohim secilin prej tyre si një patriot dhe një person të denjë, i cili nuk është i aftë të bëjë atë për të cilën dyshojnë autoritetet hetuese”, thuhet në një përkthim të letrës.

“Në këtë situatë nuk kemi frikë vetëm për fatin e kolegëve tanë. Ne thjesht nuk e kuptojmë se si të vazhdojmë të bëjmë punën tonë,” shtuan nënshkruesit e letrës, duke treguar frikën e tyre për t'u akuzuar edhe për tradhti për thjesht kryerjen e detyrave të tyre si shkencëtarë.

“Ajo për çfarë shpërblehemi sot dhe japim shembull për të tjerët, nesër bëhet shkak për ndjekje penale”.

Detajet e akuzave kundër të treve janë të klasifikuara, por portali i lajmeve të qytetit shkencor ku ata janë të vendosur tha se Maslov dyshohej se i kishte kaluar sekretet Kinës.

Burimi tha se Maslov pohon pafajësinë e tij dhe “nuk e konsideron veten tradhtar. Ai beson se ka bërë gjithmonë gjithçka në mënyrë korrekte”.

Menjëherë pas arrestimit të tij, Maslov u dërgua në burgun Lefortovo në Moskë, një ish-lokal i marrjes në pyetje të KGB-së, përpara se të transferohej në Shën Petersburg për t'u gjykuar.

Parlamenti rus votoi në prill për të rritur dënimin maksimal për tradhti në burgim të përjetshëm nga 20 vjet.