Lufta në Ukrainë: Kievi goditet nga një numër i madh dronesh kamikazë rusë

Rusia ka nisur një sulm të ri masiv me dron gjatë natës në kryeqytetin e Ukrainës Kiev, duke vrarë të paktën një person, kanë thënë zyrtarët lokalë.

Kryetari i bashkisë së Kievit, Vitaliy Klitschko tha se një burrë vdiq kur rrënojat e dronit ranë pranë një karburanti. Një grua ka mbetur e plagosur.

Ai tha se mbrojtja ajrore kishte rrëzuar më shumë se 20 dronë që shkonin drejt Kievit përpara se një "valë e re dronësh” të godiste qytetin.

Administrata ushtarake e Kievit më vonë tha se më shumë se 40 drone ishin rrëzuar, duke cituar informacionin paraprak.

Rusia - e cila filloi pushtimin e saj në shkallë të plotë në shkurt 2022 - javët e fundit ka rritur sulmet e saj në Kiev, duke kërkuar të mposhtë mbrojtjen e kryeqytetit.

Më herët të dielën, alarmet për sulm ajror u aktivizuan në 12 rajone të Ukrainës, nga Volyn në veri-perëndim deri në Dnipropetrovsk në jug-lindje.

Në një postim në mediat sociale, Klitschko u bëri thirrje banorëve të Kievit që të "qëndrojnë në vendstrehime", duke paralajmëruar se nata do të ishte "e vështirë".

Ai tha se të paktën dy ndërtesa të larta në rrethe të ndryshme të kryeqytetit ishin në flakë pasi u goditën nga rënia e dronëve.

Zyrtarët e Kievit raportuan gjithashtu se magazinat në lagjen jugore Holosiyivsky ishin djegur.

Punonjësit e urgjencës janë në detyrë.

Sulmi i fundit vjen pasi banorët e qytetit shënojnë Ditën vjetore të Kievit - një festë popullore në kohë paqësore.

Ka pasur gjithashtu raporte për shpërthime në qytetin Zhytomyr, në perëndim të Kievit.

Më pas alarmi ajror u hoq në kryeqytet dhe në të gjithë vendin.

Në sulmet e saj të fundit, Rusia ka përdorur të ashtuquajturat drone kamikaze, si dhe një sërë raketash lundrimi dhe balistike.

Sulmet vijnë përpara një kundërofensive të pritshme ukrainase.

Të shtunën, një nga zyrtarët më të lartë të sigurisë në Ukrainë i tha BBC-së se vendi ishte gati për të nisur një operacion të tillë.

Oleksiy Danilov, sekretari i Këshillit të fuqishëm të Sigurisë Kombëtare dhe Mbrojtjes së Ukrainës, tha se një sulm për të rimarrë territorin nga forcat pushtuese të Presidentit Vladimir Putin mund të fillojë "nesër, pasnesër ose pas një jave".

Ukraina ka planifikuar një kundërsulm prej muajsh. Por ajo ka kërkuar sa më shumë kohë të jetë e mundur për të trajnuar trupat dhe për të marrë pajisje ushtarake nga aleatët perëndimorë.