Policia franceze ka akuzuar pesë ushtarë për vdekjen e 27 personave që u mbytën teksa tentonin të kalonin Kanalin Anglez më 24 nëntor 2021.

Ata janë mes nëntë personave të ndaluar për t'u marrë në pyetje dhe akuzohen se nuk arritën të ndihmonin barkën që u fundos, tha një burim gjyqësor.

Rreth 15 thirrje nga barka u injoruan, raportuan mediat franceze.

Fatkeqësia është më e keqja e llojit të saj në histori. Emigrantët ishin kryesisht kurdë irakianë dhe të moshës 7 deri në 46 vjeç.

Lajmi i aktakuzës u mirëprit nga një zëdhënës i “Utopia 56”, një organizatë që përfaqëson emigrantët.

“Ne mund të jemi vetëm të kënaqur që gjërat po përparojnë nga pikëpamja kriminale”, tha Flore Judet.

Anija e vogël u mbyt pak pasi u largua nga bregu francez, duke çuar në vdekjen e të gjithë, përveç dyve prej tyre në bord -  burra, gra dhe fëmijë.

Gazeta Le Monde raportoi më parë se pasagjerët kishin kontaktuar fillimisht me zyrtarët në qendrën e shpëtimit të Kanalit të Francës në orën 01:48, duke thënë se varka e tyre ishte duke u shfryrë dhe motori i tyre nuk punonte.

Grupi thuhet se dërgoi vendndodhjen e tyre me WhatsApp 15 minuta më vonë, por autoritetet nuk u përgjigjën. Ekipet e shpëtimit u përgjigjën përfundimisht 10 orë më vonë, pasi peshkatarët ngritën alarmin.

Duke folur në kohën e tragjedisë, Organizata Ndërkombëtare e OKB-së për Migracionin (IOM) tha se fatkeqësia ishte humbja më e madhe e jetës në Kanal që kur kishte filluar të mblidhte të dhëna në vitin 2014.

Kryeministri i atëhershëm i Mbretërisë së Bashkuar Boris Johnson tha se ishte "i tmerruar" nga incidenti, duke shtuar se vendi i tij nuk do të linte "asnjë gur pa lëvizur" për të ndaluar bandat e trafikimit të qenieve njerëzore.

Në nëntor 2022, një 32-vjeçar u paraqit në një gjykatë në Londër në lidhje me katastrofën, pasi u akuzua se ishte pjesë e një grupi që komplotonte për të transportuar emigrantët në Mbretërinë e Bashkuar.

Harem Ahmed Abëbaker pretendohej se u kishte ofruar para familjeve të emigrantëve që u mbytën për të qëndruar në heshtje.

Qershorin e kaluar, policia franceze arrestoi 15 persona - kryesisht nga Afganistani - të cilët akuzohen si pjesë e një rrjeti kontrabandë të përfshirë në incidentin vdekjeprurës.

Qeveria e Mbretërisë së Bashkuar është zotuar të merret me problemin e kalimeve me varka të vogla të Kanalit Anglez pasi shifrat rekord arritën nga ajo rrugë vitin e kaluar.