Të gjitha vendet, pa përjashtim, duhet të respektojnë rreptësisht detyrimet e tyre sipas Traktatit për Mospërhapjen e Armëve Bërthamore (NPT).

Kështu u shpreh Izumi Nakamitsu, nënsekretarja e Përgjithshme e OKB-së dhe Përfaqësuesja e Lartë për Çështjet e Çarmatimit, teksa iu referua deklarateve të presidentit rus, Vladimir Putin për vendosjen e armëve bërthamore taktike ruse në Bjellorusi, shkruan Tass.

“Të gjitha shtetet duhet të shmangin marrjen e çfarëdo veprimi që mund të çojë në përshkallëzim” tha ajo në seancën e Këshillit të Sigurimit të OKB-së.

“Të gjitha shtetet – palë në Traktatin për Mospërhapjen e Armëve Bërthamore ose NPT, shtetet me armë bërthamore dhe shtetet jo-armë bërthamore njësoj, duhet t’u përmbahen rreptësisht angazhimeve dhe detyrimeve që kanë marrë në bazë të traktatit”, shtoi Nakamitsu.