Moska mund të kërkojë kompensim për dëmet e pësuara në tubacionet e gazit natyror Nord Stream 1 dhe 2 pas shpërthimit që ndodhi vitin e kaluar, njoftoi sot agjencia e lajmeve RIA Novosti, duke cituar një diplomat rus.

Në shtator, pati shpërthime në dy tubacionet që lidhin Rusinë me Gjermaninë, ku Moska e quajti atë një akt terrorizmi ndërkombëtar.

“Nuk e përjashtojmë mundësinë që më vonë të ngremë çështjen e kompensimit të dëmeve të shkaktuara nga shpërthimi i tubacioneve të gazit natyror Nord Stream”, tha Dmitry Birysevsky, kreu i Shërbimit të Bashkëpunimit Ekonomik të Ministrisë së Punëve të Jashtme të Rusisë, në një intervistë që dha për agjencinë.

Birysevsky nuk specifikoi se nga kush do të kërkonte kompensim Rusia, duke shtuar se e ardhmja e padive ishte e paqartë.

“Për momentin është shumë e vështirë të flitet për të ardhmen e gazsjellësit Nord Stream. Në përgjithësi, sipas ekspertëve, tubacionet mund të riparohen”, vuri në dukje ai. Kremlini ka treguar se aksionerët do të vendosin nëse tubacionet duhet të çaktivizohen. Burimet i thanë Reuters javën e kaluar se tubacionet, të ndërtuara nga Gazprom shtetëror i Rusisë, do të mbylleshin pasi nuk kishte plane të menjëhershme për t’i riparuar apo rihapur ato.
Nord Stream 1, i cili kushtoi 7.4 miliardë euro, filloi funksionimin në nëntor 2011. Ndërtimi i Nord Stream 2, i cili kushtoi më shumë se 10 miliardë euro, përfundoi në shtator 2021, por nuk u vu kurrë në punë.

Bryshevsky u ankua gjithashtu se vendet perëndimore kundërshtojnë projekt-rezolutën e përgatitur nga Rusia, e cila i bën thirrje Këshillit të Sigurimit të OKB-së të kërkojë një hetim ndërkombëtar për shpërthimet.

“Megjithatë, ne synojmë të vazhdojmë të insistojmë në një hetim ndërkombëtar gjithëpërfshirës dhe të hapur me pjesëmarrjen e detyrueshme të përfaqësuesve rusë”, theksoi ai.