Plani i Gjermanisë për legalizimin e kanabisit ka marrë reagime pozitive nga Bashkimi Evropian, sipas ministrit të Shëndetësisë Karl Lauterbach, i cili njoftoi se një projekt-ligj për legalizimin e kanabisit do të paraqitet në javët e ardhshme.

Gjermania po ecën përpara me planin e saj për legalizimin e kanabisit për përdorim mjekësor, duke synuar të bëhet vendi i parë evropian që rregullon me ligj, shitjen e produkteve të kanabisit, njofton Forbes.

Por ndërsa kornizat ligjore mbikombëtare mund të paraqesin pengesa për legalizimin, Lauterbach ka marrë reagime pozitive nga BE, duke theksuar se legjislacioni duhet të jetë në përputhje me rregulloret e BE-së.

Lauterbach ka shprehur besimin se planet e tij për legalizimin e kanabisit do të miratohen nga BE. Në fjalën e tij në Bruksel më 14 mars, përpara një takimi me homologët e tij të BE-së, Lauterbach tha se kishte marrë "përgjigje shumë të mira" nga Komisioni Evropian. Meqenëse kishte shqetësime nëse legalizimi do të përputhej me ligjin evropian, Lauterbach e kishte rishikuar projektin e tij në Komisionin e BE-së.

Përveç kësaj, Lauterbach njoftoi se një projekt-ligj në lidhje me legjislacionin e kanabisit do të prezantohet "në javët e ardhshme".

Së shpejti do të paraqesim një propozim që funksionon, pra që është në përputhje me ligjin evropian”, tha ai.

Ministri ishte gjithashtu optimist se propozimi do të reduktonte krimin e lidhur me drogën dhe do ta bënte përdorimin e kanabisit më të sigurt.

“Ne do t'i arrijmë këto synime”, tha ai.

Projektligji ka të ngjarë të bazohet në planin për legalizimin e kanabisit për përdorim të të rriturve, i cili u miratua në tetor, dhe në disa seanca dëgjimore me ekspertë dhe palë të interesuara që u zhvilluan vitin e kaluar.

Plani fillestar propozon disa kufizime për zotërimin e kanabisit, duke përfshirë një kufi prej 30 gramë për të rriturit e moshës 18 vjeç e lart.

Plani gjithashtu lejon kultivimin në shtëpi të deri në dy bimë dhe lejon dyqanet dhe farmacitë e licencuara të shesin produkte kanabisi.

 Për më tepër, marketingu dhe reklamimi i këtyre produkteve do të ndalohet, dhe do të kërkohet që pikat e shitjes të vendosen larg shkollave dhe mjediseve rinore.

Për më tepër, do të ishte e detyrueshme që kanabisi rekreativ i shitur në Gjermani duhet të rritet dhe të prodhohet në vend.

Megjithatë, një nga pengesat ligjore për rregullimin me ligj të kanabisit në Gjermani përfaqësohet nga ligjet ndërkombëtare dhe evropiane, të cilat e ndalojnë legalizimin e kanabisit për përdorim rekreativ.

Gjermania është aktualisht në pritje të miratimit nga Komisioni Evropian dhe Lauterbach shpjegoi se do të bëhen disa ndryshime në planin fillestar të qeverisë për t'u përshtatur me rregulloret evropiane. Megjithatë, ai nuk ka specifikuar se cilat do të jenë këto ndryshime. Ai deklaroi se rishikimet do të marrin parasysh se çfarë duhet ose nuk duhet të njoftohet.

Kanabisi trajtohet në Konventën e Shengenit të vitit 1985 dhe në Vendimin Kuadër të BE-së 2004/757/JHA në nivel të Bashkimit Evropian, i cili kërkon që shtetet anëtare të luftojnë trafikun e paligjshëm të drogës.

Politika aktuale e Gjermanisë për drogën drejtohet nga Ligji për Drogën Narkotike, por ndryshimet në këtë kuadër mund të jenë të nevojshme për rregullimin e kanabisit.

Nëse një vend anëtar shkel rregulloret e BE-së, komisioni i BE-së mund të fillojë një procedurë zyrtare për të kërkuar veprime korrigjuese.

Mosrespektimi mund të rezultojë në sanksione financiare dhe çështja përfundimisht mund t'i referohet Gjykatës Evropiane përmes procedurave gjyqësore ligjore.

Për më tepër, plani i Gjermanisë për legalizimin e kanabisit do të ishte i papajtueshëm me traktatet ndërkombëtare, duke përfshirë Konventën e vetme të vitit 1961.

Prandaj, qeveria e koalicionit gjerman po kërkon të pajtohet me legjislacionin evropian duke ruajtur qëllimet e veta, përfshirë reduktimin e krimit dhe përdorimin e kanabisit sa më të sigurt për të mbrojtur të rinjtë.

Në fakt, shëndeti publik dhe mbrojtja e të rinjve kanë qenë themeli i të ashtuquajturit koalicioni Semafor, kur shpalli synimin për legalizimin e kanabisit pas zgjedhjeve të përgjithshme në fund të vitit 2021.

Megjithatë, disa ekspertë besojnë se vendosja e kufizimeve të tepërta në tregun ligjor, si ndalimi i operacioneve të reklamave dhe marketingut dhe kufizimi i niveleve të THC, mund të mos e frenojë efektivisht tregun e paligjshëm.

Nëse Gjermania kapërcen me sukses pengesat ligjore ndërkombëtare dhe evropiane dhe vazhdon me legalizimin e kanabisit rekreativ, ai pritet të hyjë në fuqi të plotë në vitin 2024.