Rreth 16,000 njerëz tashmë dihet se kanë vdekur pas tërmeteve të së hënës në Turqinë jugore dhe Sirinë veriore.

Pa strehim, ujë, karburant ose energji elektrike, Organizata Botërore e Shëndetësisë ka frikë se shumë të mbijetuar rrezikojnë të humbasin jetën e tyre, njofton BBC.

OBSH thotë se ekziston rreziku se do të ketë një fatkeqësi dytësore që mund të shkaktojë dëm për më shumë njerëz sesa tërmeti fillestar

Ekipet e shpëtimit po vazhdojnë punën e tyre të mundimshme, por shpresat po zbehen për shumë njerëz ende të bllokuar nën rrënoja

Dhjetra organizata bamirëse britanike do të nisin një apel më vonë për të mbledhur fonde për njerëzit e prekur

Turqia thotë se shpreson të hapë dy pika të tjera kufitare në Siri për të mundësuar dërgimin e furnizimeve shumë të nevojshme atje.

Kanë kaluar tre ditë që kur goditi tërmeti dhe organizata bamirëse Save the Children thotë se mundësia për të marrë strehim, furnizime mjekësore, ujë dhe ushqim në zonat më të prekura po mbyllet me shpejtësi.

Tërmetet vlerësohet të kenë prekur rreth 23 milionë njerëz, mes tyre shumë fëmijë - dhe të mbijetuarit po luftojnë për të përballuar kushtet e ngrirjes.

Të prekurit kanë nevojë urgjente për ndihmën bazë humanitare si batanije dhe ujë të pastër. Prioritet në rritje është edhe higjiena në strehimoret e përkohshme, thekson organizata bamirëse.

"Ka objekte të kufizuara higjienike dhe  të burimeve ushqimore," thotë Berna Koroglu, Koordinatore e Ekipit të Reagimit të Emergjencave të Save the Children, e cila aktualisht ndodhet në Hatay, Turqi.

“Ne kemi nevojë për mbështetje, dhe veçanërisht për ndihmën e parë psikologjike për fëmijët, të cilët kanë parë se si u shembën shtëpitë dhe shkollat e tyre.

"Komuniteti ndërkombëtar duhet të bëjë gjithçka që mundet për të mbështetur punonjësit humanitarë vendas."