Ish-kryeministri izraelit Naftali Bennett ka thënë në një intervistë se presidenti rus Vladimir Putin i tha atij se nuk do të përpiqej ta vriste presidentin ukrainas Volodymyr Zelensky, një premtim i bërë gjatë një udhëtimi në Moskë menjëherë pasi Rusia nisi pushtimin e Ukrainës vitin e kaluar.

Duke folur në një ‘podcast’ me gazetarin izraelit Hanoch Daum, i publikuar të dielën, Bennett tha se mori siguri nga Putini se jeta e presidentit ukrainas nuk ishte në rrezik gjatë një vizite të fshehtë në kryeqytetin rus marsin e kaluar, me qëllim ndërmjetësimin gjatë ditëve të para të luftës, raporton The Guardian.

“E pyeta: ‘A po planifikon ta vrasësh Zelenskyn?’ Ai tha: ‘Unë nuk do ta vras Zelenskyn’. Më pas i thashë: ‘Duhet të kuptoj që po më jep fjalën që nuk do ta vrasësh Zelenskyn’. Ai tha: ‘Unë nuk do ta vras Zelenskyn’”.

Bennett tha se më pas thirri udhëheqësin ukrainas rrugës për në aeroportin e Moskës, ku Zelensky e pyeti: “A je i sigurt?” dhe unë i thashë: “Po, 100 për qind, ai nuk do të të vrasë”.

Komentet e Bennett vijnë pas pretendimeve për BBC javën e kaluar nga ish-kryeministri britanik Boris Johnson, i cili tha se Putini e kishte kërcënuar atë me një sulm raketor që do të zgjaste vetëm një minutë. Kremlini tha se Johnson po gënjen.

Gjithashtu të dielën, kancelari gjerman, Olaf Scholz, i tha gazetës Bild am Sonntag se Putini “nuk ka bërë asnjë kërcënim kundër meje apo Gjermanisë” pavarësisht kritikave të përsëritura dhe të drejtpërdrejta të Scholz për pushtimin ndaj udhëheqësit rus.

Sipas Bennett, gjatë përpjekjeve të tij ndërmjetësuese, Zelensky ra dakord të hiqte dorë nga ideja se Ukraina do të bashkohej me NATO-n dhe Putini hoqi dorë nga një betim për të kërkuar çarmatimin e Ukrainës në mënyrë që t’i jepte fund luftës. “Gjithçka që bëra ishte e koordinuar me SHBA-në, Gjermaninë dhe Francën”, tha ai.