Të paktën 10 persona kanë humbur jetën pasi një zjarr i madh përfshiu një hotel në Kamboxhia në kufirin me Tajlandën.

Zjarri shpërtheu në Grand Diamond City në qytetin kufitar të Poipet rreth orës 23:30 të mërkurën.

Rreth 400 persona ishin në ndërtesë kur u përfshi nga flakët. Videot që u publikuan në mediat sociale tregonin njerëzit duke u hedhur nga katet e sipërme të godinës.

Shumë shtetas tajlandez ishin në hotel. Autoritetet po punojnë ende për të përcaktuar shkakun e zjarrit.

Disa nga të plagosurit u transferuan në spitalet në provincën Sa Kaeo të Tajlandës, tha një zyrtar i ministrisë së jashtme të Tajlandës për agjencinë e lajmeve AFP.

Poipet është një pikë kalimi kyçe midis dy vendeve. Gjithashtu është e njohur për kazinotë e saj, të cilat shumë shtetas tajlandez i vizitojnë sepse kumari është i paligjshëm në Tajlandë.