Presidenti i Ukrainës, Volodymyr Zelensky tha se ai është nisur për në Uashington, ku do të takohet me Presidentin amerikan Joe Biden të mërkurën.

Ky është udhëtimi i tij i parë jashtë vendit që nga pushtimi rus në shkurt, njofton BBC.

Shtëpia e Bardhë ka konfirmuar gjithashtu udhëtimin dhe tha se do të furnizojë Ukrainën me një bateri raketash Patriot, duke rritur ndjeshëm aftësinë e mbrojtjes ajrore të vendit.

Të martën u mbushën 300 ditë që kur Rusia pushtoi Ukrainën.

Zelensky gjithashtu do t'i drejtohet me një fjalim Kongresit dhe do të zhvillojë një sërë takimesh dypalëshe.

“Në rrugë e sipër për në SHBA për të forcuar aftësitë elastike dhe mbrojtëse të Ukrainës”, shkroi ai në Twitter.

Zelensky rregullisht pret liderë të huaj në kryeqytetin, Kiev dhe ka vizituar trupat përreth Ukrainës. Ai bëri një vizitë të paparalajmëruar në qytetin e vijës së parë të frontit, në Bakhmut, të martën.

Presidenti ukrainas gjithashtu ka folur shpesh me liderët botërorë me telefon dhe me video-telefonatë - shpesh nga zyra e tij në Kiev.

Por një vizitë e paparalajmëruar në një shtet të huaj shënon të parën që nga fillimi i luftës dhe gjithashtu sinjalizon rëndësinë e marrëdhënieve të Ukrainës me SHBA-në, e cila ka luajtur një rol udhëheqës në ofrimin e mbështetjes ushtarake.

Në një letër të martën, kryetarja e Dhomës Demokratike Nancy Pelosi u kërkoi anëtarëve të Kongresit që të jenë të pranishëm të mërkurën mbrëma.

“Ju lutemi të jeni të pranishëm për një fokus shumë të veçantë te demokracia”, ka shkruar ajo, pa dhënë detaje të tjera.

Çfarë do të thotë raketa amerikane Patriot për Ukrainën

Sistemi i ri raketor Patriot i premtuar nga SHBA do t'i mundësojë Ukrainës të mbrojë infrastrukturën e saj jetike kundër sulmeve ruse. Zyrtarët ukrainas kanë kohë që bëjnë thirrje për sisteme më të fuqishme të mbrojtjes ajrore nga Perëndimi.

Rusia e ka vënë në shënjestër sektorin energjetik të Ukrainës, duke zhytur miliona njerëz në errësirë në dimër me temperatura disa gradë nën zero.

Në konferencën e saj përpara vizitës së Zelenskit, Shtëpia e Bardhë konfirmoi gjithashtu një paketë të re prej afro 2 miliardë dollarësh ndihmë për Ukrainën.

Aktualisht po punohet gjithashtu për të miratuar një projekt-ligj që do t'i jepte Ukrainës më shumë se 40 miliardë dollarë  financim shtesë deri në vitin 2023.

Për sa i përket shpenzimeve të përgjithshme për mbështetjen e drejtpërdrejtë ushtarake që nga fillimi i konfliktit, SHBA-ja ka kryer shumë më tepër se çdo vend tjetër.

Presidenti Zelensky ka bërë thirrje për më shumë fonde dhe ka thënë se kostoja mujore e mbrojtjes për Ukrainën ishte rreth 5 miliardë dollarë.

Vizita e tij në Uashington vjen një ditë pasi ai bëri një vizitë të paparalajmëruar në qytetin e vijës së parë të Bakhmutit, ku forcat ukrainase dhe ruse kanë zhvilluar një betejë të ashpër disa mujore.

Ai takoi trupat dhe shpërndau çmime për ushtarët, tha Presidenca.

Vizita ishte një shfaqje e rëndësishme e kundërshtimit - dhe një demonstrim i mbështetjes për forcat ukrainase të përfshira në disa nga betejat më të ashpra në javët e fundit.