Katër emigrantë  kanë humbur jetën mesnatën e shkuar në Kanalin Anglez, pasi gomonia e tyre po mbytej, në ujërat e akullta. Gomonia mendohet të jetë përmbysur rreth pesë milje larg Dungeness, duke detyruar më shumë se 40 persona të rrezikonin jetën në detin e akullt, ku koha e mbijetesës do të ishte jashtëzakonisht e ulët.

Një zëdhënës i Prefekturës Detare të Channel në Francë tha se marina franceze dhe një "anije peshkimi në zonë ndihmuan në shpëtim". Ai tha se anija u nis nga brigjet e Francës veriore në orët e para të së mërkurës. Kushtet e motit ishin 'jashtëzakonisht të ftohta', pavarësisht detit të qetë.

Daily Mail jep të dhëna se nga ishin emigrantët e shpëtuar dhe jep rrëfimin e kapitenit të anijes së peshkimit që u shkoi në ndihmë.

Kapiteni tregoi se si emigrantët e mbytur 'ulërinin' për ndihmë si në skenat e 'kohës së luftës' . Ndërsa katër konfirmohen të vdekur në tragjedinë e Kanalit,  ekziston frika se numri do të rritet më tej ndërsa Ministrja e Brendshme britanike Suella Braverman tha se kjo tregoi pse duheshin të ndalohen kalimet

Kapiteni Raymond tha: " “Ishte si diçka nga një film i Luftës së Dytë Botërore, kishte njerëz në ujë kudo, duke bërtitur."

Ata që u ngjitën sipër në bord - të cilët ishin nga Afganistani, Iraku, Senegali dhe India - thanë se i kishin paguar 5000 paund një trafikanti në Francë për kalimin e tyre.

Edhe pse 43 persona u shëruan dhe po marrin trajtim, katër janë konfirmuar tani të vdekur - me frikën se numri i zymtë mund të rritet.

Kryeministri britanik Rishi Sunak - i cili njoftoi një paketë ligjesh për të ndalur kalimet e Kanalit anglez vetëm disa orë përpara zhvillimit të fundit të zymtë – u shpreh këtë pasdite me trishtim për 'humbjen tragjike të jetës njerëzore'.

Duke bërë një deklaratë për deputetët më pas, Sekretarja e Brendshme Suella Braverman tha se vdekjet janë "kujtesa më e mprehtë e mundshme se pse duhet t'i japim fund këtyre kalimeve".

Ajo tha se paketa e masave e Kryeministrit ishte një thirrje se qeveria britanike 'duhet të shkojë shumë më tej' dhe të ndalojë trafikantët e njerëzve.

Kryeministri Sunak deklaroi dje se do të jepeshin më shumë mjete për të frenuar gomonet e vogla, për të shkatërruar bandat e trafikimit të njerëzve dhe për të reformuar sistemin 'e vjetëruar' të azilit.

Emigrantët që vijnë nga Shqipëria do të kthehen menjëherë me argumentin se është një vend 'i sigurt', ndërkohë që do të ketë një qasje më të ashpër ndaj imigracionit të paligjshëm dhe një përpjekje të madhe për të pastruar numrin e madh të kërkesave për azil.

Kryepeshkopi i Canterbury-t Justin Welby tha se vdekjet brenda natës treguan se "debatet rreth azilkërkuesve nuk kanë të bëjnë me statistikat, por me jetë të çmuara njerëzore".