Udhëheqësit e Gjermanisë dhe Norvegjisë shpallën një plan të mërkurën për të mbrojtur më mirë infrastrukturën detare brenda NATO-s.

“Ne e marrim shumë seriozisht mbrojtjen e infrastrukturës sonë dhe se askush nuk mund të besojë se sulmet do të mbeten pa pasoja”, tha kancelari gjerman Olaf Scholz në një konferencë shtypi në Berlin me homologun e tij norvegjez Jonas Gahr Store.

Njoftimi vjen pas shpërthimeve në tubacionet Nord Stream, të cilat sjellin gaz nga Rusia në Evropë, dhe shfaqjeve  të dyshimta të dronëve rreth platformave të naftës në det të Norvegjisë.

Scholz detajoi se kjo nismë do të bëhej nën ombrellën e NATO-s dhe do të siguronte një "reagim të shpejtë", në rast emergjence.

“Ne jemi në proces për t’i kërkuar Sekretarit të Përgjithshëm të NATO-s Jens Stoltenberg të krijojë një trup koordinues për mbrojtjen e infrastrukturës detare”, tha ai, duke i quajtur këto infrastruktura “arteriet e ekonomisë moderne”.

Katër rrjedhje të mëdha gazi u zbuluan në tubacionet Nord Stream 1 dhe 2 që furnizojnë Evropën, veçanërisht Gjermaninë e uritur për energji, me gazin rus.

Në sfondin e luftës në Ukrainë dhe sanksioneve perëndimore kundër Rusisë, shumë fuqi evropiane kanë dyshuar për sabotim dhe kanë nisur një hetim. Moska e ka mohuar se ka lidhje me incidentin, duke akuzuar Mbretërinë e Bashkuar.

As liderët gjermanë apo norvegjezë nuk treguan detaje të hollësishme se si synonin të mbronin infrastrukturën detare apo se si do të funksiononin planet.

"Jo zyrtar" në këtë fazë, Store tha se plani do të përfshinte "shkëmbim midis aktorëve civilë dhe ushtarakë" të mbështetur nga NATO.

Siguria e objekteve energjetike dhe infrastrukturës tjetër kritike, si telekomunikacioni, duhet të na  shqetësojë, shtoi ai.

Norvegjia është bërë furnizuesi më i madh në Evropë i gazit natyror që kur Rusia mbylli rubinetat në shtator.

Shefi i NATO-s Jens Stoltenberg përshëndeti propozimin gjermano-norvegjez. Ai po bën një vizitë në Berlin, të nisur që të mërkurën në mbrëmje e që do të vazhdojë deri të premten.

“NATO ka punuar për disa vite për të garantuar sigurinë e infrastrukturës detare”, tha ai në një deklaratë.

"Ne kemi shtuar përpjekjet tona pas sabotimit të fundit të tubacioneve Nord Stream dhe është jetike të bëjmë më shumë për të siguruar që infrastruktura jonë në det të mbetet e sigurt nga aktet e ardhshme të shkatërrimit," tha ai.