Ukrainasit do të ngrijnë për vdekje këtë dimër nëse Perëndimi nuk dërgon urgjentisht batanije dhe gjeneratorë për t’i mbajtur ata ngrohtë, ka thënë Vitali Klitschko.

Kryebashkiaku 51-vjeçar i Kievit dhe ish-kampioni i botës në boks në peshën e rëndë, tha për The Telegraph se sulmet në rritje ruse ndaj termocentraleve e kanë lënë vendin e tij në prag të një krize të re humanitare.

“Ne po bëjmë gjithçka që mundemi për të shpëtuar jetën e njerëzve tanë dhe për t’i mbrojtur ata,” tha ai, duke përplasur grushtat e tij të mëdhenj në tryezë. “Por ky dimër do të jetë padyshim një sfidë e madhe për ne.”

Në pak më shumë se dy javë, goditjet e Moskës në termocentralet dhe rrjetin më të gjerë e kanë lënë vendin të përballet me ndërprerjet dhe të vërë në pikëpyetje faktin nëse sistemi do t’i mbijetojë muajve të ashpër të dimrit.

Në ditët në vijim, temperaturat gjatë natës në të gjithë Ukrainën pritet të bien, duke arritur në -20 gradë Celsius në disa pjesë të vendit.

Me shumë ukrainas që jetojnë në ndërtesa të shkatërruara nga lufta, pa gaz dhe dritare, energjia elektrike është një nga metodat e vetme që ata kanë për tu ngrohur.

Klitschko dhe ekipi i tij kanë arritur të blejnë gjeneratorë dhe kanë përgatitur 1000 pika ngrohjeje mobile në Kiev. Megjithatë, ai pranoi se ata janë ende duke u përgatitur për një “skenar të rastit më të keq” në qytetin e tyre, ndërsa dimri po afron.