Pak larg një mitingu në Ankona të partisë së ekstremit të djathtë Vëllezërit e Italisë, një grup i vogël  protestuesish ngritën pankarta kundër bashkëthemelueses të saj Giorgia Meloni.

Një demonstrues mbante një pankartë ku shkruhej "Ju derdhni urrejtje dhe nuk më përfaqësoni mua".

Një tjetër tabelë thoshte: "Meloni? Vetëm me proshutë", duke iu referuar pjeprit që njerëzit zakonisht e bashkojnë me proshutën në ushqimin italian.

Partia e Melonit është pjesë e një blloku të krahut të djathtë që kryeson sondazhet e opinionit përpara zgjedhjeve të parakohshme të Italisë të dielën më 25 shtator.

Ajo gjithashtu mendohet të jetë kryeministrja e parë femër e Italisë.

Por pikëpamjet e Melonit për migrimin, të drejtat e riprodhimit dhe çështjet LGBT nënkuptojnë se ajo është një figurë që krijon ndasi.

Ajo ka qenë një mbështetëse e zëshme e atyre që ajo i përshkruan si "vlera tradicionale familjare", është tallur me idenë gjinore dhe ka dënuar ato që ajo i quan "lobe" të LGBT. Ajo është gjithashtu kundër ndryshimit të ligjit që ndalon adoptimin e fëmijëve nga beqarët në Itali.

Meloni ka folur edhe për nevojën për të rritur lindjet që janë në rënie në vendin e saj. Ndërsa ajo ka thënë gjatë fushatës së saj se do të mbështeste legjislacionin që lejon abortin deri në 12 javë të shtatzënisë,  e ka quajtur gjithashtu procedurën një "humbje".

“Gjithmonë më ka pëlqyer Giorgia Meloni që kur fillova të interesohesha për politikën”, tha Lucrezia Macchia, një modele nga Roma.

“Më pëlqen ajo që shpreh, mënyra se si është gjithmonë në krah të femrave.

"Ajo ka menduar gjithmonë për gratë. Dhe është e vetmja grua që e ka pohuar veten realisht në politikën italiane, pavarësisht se nuk ka qenë e lehtë."

Oria Gargano, presidente e një organizate që ndihmon viktimat e dhunës në familje, shprehu shqetësimin për mundësinë që partia e Melonit të fitojë zgjedhjet e ardhshme.

“’Vëllezërit e Italisë” është një parti politike që gjithmonë i ka mohuar të drejtat e grave,” tha ajo. “Ka qenë kundër abortit. Është kundër të gjithë komunitetit LGBTQ+. E konsideron abortin një tragjedi. Dhe dëshiron të krijojë një varrezë për fetuset e abortuara me emrat e nënave kudo në Itali”.

Në zgjedhjet e fundit të përgjithshme të vendit në 2018, partia e Melonit fitoi vetëm rreth 4% të votave. Këtë herë mund të fitojë deri në 25%.