Sekretari i Përgjithshëm i Kombeve të Bashkuara Antonio Guterres tha se OKB-ja është e përkushtuar për denuklearizimin e plotë të Koresë së Veriut.

Gjatë një takimi me presidentin e Koresë së Jugut, Yun Suk-yul, ai tha se rikonfirmoi "angazhimin e qartë të OKB-së për denuklearizimin e plotë, të verifikueshëm dhe të pakthyeshëm të Gadishullit Korean dhe Koresë së Veriut".

“Qëllimi kryesor është krijimi i paqes, sigurisë dhe stabilitetit në të gjithë rajonin”, tha Guterres, duke vlerësuar pjesëmarrjen e Koresë së Jugut në misionet paqeruajtëse ndërkombëtare dhe përpjekjet e saj në luftën kundër ndryshimeve klimatike.

Ai më vonë u takua me Ministren e Jashtme të Koresë së Jugut, Park Jin, e cila tha se komuniteti ndërkombëtar i udhëhequr nga OKB duhet t'i dërgojë një mesazh të fortë dhe të unifikuar Koresë së Veriut se ambiciet e saj bërthamore nuk do të tolerohen. Park i kërkoi OKB-së ndihmë për të gjetur një zgjidhje efektive për problemin e armëve bërthamore të Koresë së Veriut, tha ministria e jashtme e Koresë së Jugut.

Koreja e Veriut ka kryer më shumë se 30 lëshime provë të raketave balistike këtë vit dhe lëshoi ​​raketën e saj të parë balistike ndërkontinentale në 2017.