Centrali bërthamor në Zaporizhzhia të Ukrainës është goditur sërish, teksa Ukraina dhe Rusia fajësojnë sërish njëra-tjetrën për sulmin.

Secila palë tha të enjten se pati 10 goditje në zyrën dhe stacionin e zjarrfikësve të termocentralit më të madh në Evropë.

Në një takim të Këshillit të Sigurimit të OKB-së i thirrur për të diskutuar situatën, kreu i mbikëqyrjes së centralit bërthamor Rafael Grossi, është shprehur se ishte një ‘orë  varri.’

Sekretari i Përgjithshëm i OKB-së Antonio Guterres tha gjithashtu se kjo situatë mund të çojë në katastrofë.

Kina dhe SHBA kërkuan që ekspertët e OKB-së të lejohen të vizitojnë urgjentisht uzinën, por kërkesa të ngjashme në të kaluarën deri më tani nuk janë zbatuar.

Më herët, SHBA-ja bëri thirrje gjithashtu për krijimin e një zone të çmilitarizuar rreth uzinës:

"Lufta pranë një centrali bërthamor është e rrezikshme dhe e papërgjegjshme," tha një zëdhënës i Departamentit të Shtetit.

Megjithatë, përfaqësuesi i Rusisë në OKB tha se çmilitarizimi nuk ishte një opsion, duke sugjeruar se ai do ta bënte centralin më të prekshëm ndaj "provokimeve" dhe "sulmeve terroriste".

Objekti dhe zona përreth tij në Ukrainën qendrore-lindore panë bombardime javën e kaluar, ku Rusia dhe Ukraina gjithashtu akuzuan njëra-tjetrën për atë sulm.

Ukraina thotë se Rusia e ka kthyer vendin në një bazë ushtarake, duke nisur sulmet nga atje duke e ditur se forcat ukrainase nuk kanë gjasa të hakmerren.

Moska e mohon pretendimin.

Në një deklaratë të enjten, agjencia bërthamore e Ukrainës Enerhoatom tha se "pushtuesit rusë bombarduan përsëri uzinën e Zaporizhzhia dhe territoret pranë objektit bërthamor".

Ai tha se një zyrë administrative pranë zonës së saldimit u godit dhe disa sensorë të rrezatimit u dëmtuan.

Enerhoatom shtoi se stacioni i zjarrfikësve që ndodhet pranë uzinës ishte gjithashtu në shënjestër.

Për shkak të sulmeve, ishte e pamundur të ndërronin personelin pas turnit, kështu që ata duhej të vazhdonin punën jashtë orarit.

Por situata aktualisht është nën kontroll, tha Enerhoatom.