Franca ka riatdhesuar 35 fëmijë dhe 16 nëna nga kampet në Siri, ku mbahen anëtarët e familjeve të xhihadistëve të dyshuar të Shtetit Islamik, tha të martën Ministria e Jashtme franceze.

"Franca ka ndërmarrë sot kthimin në vendin e 35 të miturve francezë që ndodheshin në kampet në verilindje të Sirisë. Ky operacion përfshin gjithashtu kthimin e 16 nënave nga të njëjtat kampe", thuhet në një deklaratë.

Të miturit janë dorëzuar në shërbimin e mirëqenies së fëmijëve dhe do të monitorohen nga ana mjekësore, thuhet në deklaratë. Nënat i janë dorëzuar organeve kompetente gjyqësore.

Ministria e Jashtme franceze falënderoi autoritetet lokale në Sirinë verilindore për bashkëpunimin e tyre që bëri të mundur operacionin.

Një nga vendet më të rrezikshme për fëmijët

Grupet e të drejtave të njeriut i kanë kërkuar prej kohësh qeveritë e Francës dhe vendeve të tjera perëndimore që të kthejnë në atdhe fëmijët që ose u sollën në territoret në Siri dhe Irak dikur të kontrolluara nga grupi i Shtetit Islamik nga prindërit e tyre, ose lindën atje gjatë viteve të luftës.

Qindra fëmijë të shtetasve francezë po mbahen në kampet e drejtuara nga kurdët në verilindje të Sirisë, ku kequshqyerja dhe sëmundjet janë të përhapura.

Një nga më të mëdhenjtë dhe më të mbipopulluarit është kampi Al-Hol, ku fëmijët përjetonin "nivele shkatërruese të dhunës çdo ditë, duke çuar në makthe, probleme psikologjike dhe frikë për jetën e tyre", thuhej në një raport të Save the Children të publikuar në shtator 2021.

Vitin e kaluar, mesatarisht më shumë se dy njerëz vriteshin në javë, duke e bërë Al Hol, për frymë, një nga vendet më të rrezikshme në botë për një fëmijë, vinte në dukje raporti.

Shumë nga fëmijët janë me nënat ose baballarët e tyre që paraqesin rrezik dhe Franca ka këmbëngulur që shtetasit francezë të përballen me drejtësinë në vend.

Përpara operacionit të së martës, Franca kishte riatdhesuar 126 fëmijë që nga viti 2016.